Delhi-ah Congress leh AAP thawkdun dawn lo

Delhi Congress chief leh chief minister hlui Sheila Dikshit-i chuan Lok Sabha inthlanpui awm turah Delhi-ah Aam Aadmi Party (AAP) nen an thawkdun dawn lo tih a sawi. He thutlukna hi Congress president Rahul Gandhi hoa Congress hruaituten meeting an neihnaah an siam a ni.

Dikshit-i chuan thutlukna hi meeting-te telte hian lungrual taka an siam thu a sawi.

AAP hotu leh Delhi CM Arvind Kejriwal-a chuan inthlanpui awm turah BJP chu hneh ngei an ngai tih a lo sawi tawh a, hei vang hian Congress leh AAP hi an thawkdun maithei nia sawi pawh a awm a ni. Pathianni pawh khan AAP hruaitu pakhat chuan Congress hian an duh tak zet a nih chuan thawhdunna kawng zawnga inbiakna kawng a inhawn reng thu a lo sawi tawh bawk. February 12 khan Kejriwal chuan Congress chuan thawhdun pui tur an ngaihtuah tawh a, mahse rawtna an siamte an hnawl niin a sawi.