LS inthlan neih hun tur puan har vangin EC sawisel

Election Commission chu Lok Sabha inthlanpui neih hun tur a puan har avangin eptu party-ten an sawisel.

Congress senior leader Ahmed Patel chuan tun thlenga inthlanpui neih hun tur a la puan loh avangin EC lakah hian zawhna a siam a, prime minister zin programme a zawhfel hun an nghak phawt em ni? tiin a zawt.

Lok Sabha inthlanpui neih hnuhnung ber, kum 2014 kumah hian EC chuan inthlan neih hun tur hi March 5-ah a puang a ni.

Ahmed Patel chuan inthlan hun tur puan hun a tihtlai avangin BJP sorkar chu sorkar sum hmanga campaing-na hun siamsakah EC chu a puh. "Sorkar function hrang hrangte chu political rally neihna atan an hmang a, TV/radio leh print media pawh political ads hlirin a khat a ni. EC hian a theih chin chin chu sorkar sum an hman theihna turin a hun a pe a ni" tiin Amed chuan a twitter-ah a tarlang.

Hetihlai hian Chief Election Commissioner Sunil Arora kaihhruai EC high-level team chu Thawhṭanni khan ni hnih cham turin Jammu and Kashmir-ah an zin a, inthlan neih tura atana an inbuatsaih dante an enpui. Thawhṭanni khan Srinagar tlawhin, nimin khan Jammu-ah an kal a ni.

Inthlanpui neih hun tur puang harah EC hi puh ni mah se, 16th Lok Sabha term tawp hi June 3 a ni a, hei vang hian EC pawh hi a hmanhmawh lo niin a lang. Lok Sabha term thar tur session hmasa ber hi June 3-ah neih a ni ang.

Kum 2014 Lok Sabha inthlan kha thawhkua-ah neih niin, April 7 - May 12 inkarah neih a ni a, EC chuan inthlan neih hun tur hi March 5-ah a puang a ni. May 16-ah vote chhiar niin, PM Modi-a kaihhruai sorkar thar chu May 26-ah lakluh a ni. Kum 2009 Lok Sabha inthlan chu April 16 - May 13 inkarah thawh nga-a neih a ni a, EC hian March 2-ah press conference neiin inthlan neih hun tur hi a puang. May 16-ah vote chhiar a ni.

Kum 2004 Lok Sabha inthlan neih hun tur kha February 29-ah EC hian puangin, April 20 - May 10 inkarah thawh li-a neih a ni a, May 13-ah vote chhiarin result puan a ni.