PM-in light off tura a sawmna Ngaihtuah ṭha turin Maha minister-in ngen

Prime minister Narendra Modi-a'n Zirtawpni zing dar 9-a video message a tihchhuahah, India ram mipuite chu Pathianni zan dar 9-a minute 9 chhung light off a, bati leh eng dang chhi tura a ngenna chuan sawizui a hlawh hle.

Modi hian hri lengin India rama thimna a rawn thlen beih letna turin bati leh eng dangte chhi turin a thuchah tihchhuahah hian a sawi a ni. Mahse Maharashtra energy minister Dr Nitin Raut chuan PM hi a sawmna siam hi ngaihtuah ṭha tura ngenin, ram mipuite'n a ruala light an off ṭhup chuan gridl failure thlenin, emergency service thlengin a nghawng pawi thei dawn a ni, a ti.

Eptu hruaitu hrang hrangte chuan PM thusawi hi an bei zui. Congress MP Shashi Tharoor chuan mipuite manganna chhawk zangkhaina tur lam hawi engmah a sawi lo chu leh, lockdown a zawh hnuah kal zel dan tur hmathlir engmah a nei lo chu a dem thu a sawi. 

Maharashtra housing minister Jitendra Awhad pawhin, "Thil engkim mai infiamna anga an ngai zel hi hriatthiam a har a ni. Hei hi chu atna leh naupang infiamna ang mai a ni," tiin PM sawmna siam chungchang hi a sawi zui. 

Union finance minister hlui P Chidambaram chuan kar thum zet hna thawk thei loa mipuite kharkhip an nih avanga a tuar nasa ber tur, mi retheite chhawmdawlna leh an tana hmalakna tur sorkarin a puan theih loh chhan a zawt. "Mi rethei, nitina inhlawhfate tana Financial Action Plan puan kan lo beisei a, kan economy tlahniam mek siamna turte i puan kan lo ring a ni," tiin PM thusawi chuan beisei a phak loh thu a sawi. "Mahse i thu zawmin April 5 zanah chuan bati kan lo chhi ang a, mahse hemi vang hian kan thu te ngaihthlain epidemiologist leh economist-te thurawn i ngaihthla ve thung tawh tur a ni," tiin PM hi a chhang. 

Trinamool Congress MP Mahua Moitra pawhin, PM chu thil tak tak  ngaihtuah a, mi retheite chhawmdawlna turte ngaihtuah turin a ti. "Light off ula, balcony-ah chhuak rawh u? Thil tak tak ngaihtuah zawk rawh. Lockdown avanga hnathawk thei loa awm, nitina inhlawhfa ṭhinte hlawh hi pe thuai zawk rawh," tiin a twitter-ah a chhang ve bawk. 

Congress hruaitu Digvijay Singh chuan PM chu thusawi thiam tak a ni tih sawiin, mipuite bati leh eng dang chhi tura sawm ringawt loin hri leng mek chungchanga zirtirna pein, sorkarin a tih dik tawk lote sawi a, a hmalak dan turte a sawi zawk tur a ni, a ti. Singapore prime minister  Lee Hsien Loong-a'n an ram mipuite zirtirna a pek dante chu entawn se a duh thu a sawi. 

West Bengal chief minister Mamata Banerjee pawhin PM thusawi ringtute chuan a thu chah hi an zawm thei ang tiin, "Prime minister chuan a rilrua awm a sawi a, kei pawhin ka rilrua awm ka sawi mai ang. Tu nunah pawh kan inrawlh dawn lo. PM chuan thil ṭha tak a sawi nia i ngaih chuan zawm la, i thu thu a ni e