Defence Ministry aṭangin Rafale deal document rukchhuah a ni : Sorkar laipui

Sorkar laipui chuan nimin khan Supreme Court hnenah France aṭanga Rafale fighter jet leina tura inremna an siam chungchang ziahna, Rafale deal document-te Ministry of Defence aṭanga rukchhuah a nih thu a hrilh.

Attorney General of India KK Venugopal chuan nimin Rafale deal document rukchhuah a nih thu hi sawiin, chhui mek a nih thu a hrilh nghal bawk. Hemi rual hian heng document-te hi court-ah pholan theih a nih loh thu sawiin, pholan chu Official Secrets Act bawhchhiatna a ni dawn tih a sawi a, ram himna thlengin a nghawng thei dawn tih a sawi. Venugopal chuan heng document-te hi 'secret' tia dah niin, mipui vantlang hmuh theiha pholan theih a ni lo, a ti.

Nimin khan sorkar laipuiin Rafale fighter jet 36 leina tura France sorkar inremna a siampui danah thil dik tawk lo leh sorkarin thu dik a zep nia sawia union minister hlui pahnih Yaswant Sinha leh Arun Shourie bakah activist lawyer Prashan Bhushan-te review petition thehluh chu Chief Justice of India Ranjan Gogoi kaihhruai, Justices Sanjay Kishan Kaul leh KM Joseph-te awmna bench chuan a ngaihtuah a ni.

Petition thehluttu pathumte hian nikum December 14-a Supreme Court-in Rafale deal chungchanga thutlukna a lo siam tawh, he thil hi a lo ngaihtuah ve tur a ni lo tia sawi chu ngaihtuah ṭha leh turin a ngen a ni. Petition an thehluh leh hnu hian CJI Ranjan Gogi chuan AG Venugopal hnenah sorkar hmalak dante thehlut turin a hriattir a, Venugopal hian Rafale document rukchhuah a nih thu hi a hrilh a ni.

AG Venugopal chuan SC hnenah hian Rafale review petition thehluh chu hnawlsak turin a ngen. Rafale man chungchang ziahna paper chu rukchhuah niin The Hindu newspaper-ah chhuah tura pek a ni a, hei hi petition thehluttute hian ṭanchhanah an hmang niin a sawi. Heng document-te mipui hmuh theih tura dahchhuakte chu Official Secrets Acts hnuaiah an dik lo a, court zah lohah ngaih an ni bawk a ni, a ti.

Mahse petition thehluttu zinga mi Prashan Bhushan chuan dan kalhah thiltih an neih loh thu sawiin, file-a information-te chu Right to Information hmanga zawh theiha a awm thu a sawi thung.