Balakot-a JeM building tihchhiat an awm lo : US satellite operator IAF-in bomb thlak 80% in target fuh niin a sawi

India-in Indian Air Force (IAF) ten Pakistan-a Jaish-e-Mohammad (JeM) firfiak camp an bomb chhiat thu leh, firfiak eng emaw zat an thi tel nia sawi hnuah San Francisco-a private satellite operator, Planet Labs Inc-in sattelite image a tihchhuahah, camp-a firfiak pawl building paruk chu tihchhiat loin an la ding vek a ni.

IAF-te hian February 26 zing khan Mirage-2000 fighter jet 12 hmangin JeM camp hi bomb kg 1,000 velin an bei tih an sawi a, an target tak fuhin firfiak pawl camp lian ber hi an bomb chhiat thu an sawi. Mahse Planet Labs Inc-in air strike neih aṭanga ni ruk hnu, March 4-a satellite image a tihchhuahah camp chhunga building-te chu a ngaiin an la ding a, nikum April thlaa satellite aṭanga a thla a lak nen an la danglam lo niin a sawi. Heng inte hi a chung lamah kahna awng emaw, bang chhia emaw, thingkung tlu leh thlawhtheihna hmanga beihna hnuhnma hmuh tur a awm lo a ni.

He thlalak chungchangah hian Reuters news agency chuan foreign ministry leh defence ministry-te zawhna a thawn nghal a, mahse tun thlengin an la chhang lo. Sorkar lam pawhin tun thlengin JeM camp beih chungchangah satellite image a la tichhuak lo bawk.

Middlebury Institute of International Studies-a East Asia Nonproliferation Project director, Jeffrey Lewis chuan thlalak aṭang hian JeM ho structure-te chu tihchhiat lohin an la ding ngei a ni tih a nemnghet a, 'High-resolutin image aṭang hian bomb in a tihchhiat hnuhma engmah a lang lo a ni", a ti.

James Martin Center-a senior research associate Jeffrey Lewis leh Dave Schmerler-te pawhin satellite image hi zirchiangin, "An sawi angin air strike hi hlawhtling ni se chuan, hetianga ralthuam lian thamin thil a tihchhiat hnuhma chu thlalakah hian a lang ngei tur a ni, " an ti a, mahse thil tihchhiat engmah an hmuh loh thu an sawi.

Reuters reporter-ten Balakot enfiah
India-in air strike hlawhtling takin a nei nia a sawi hi Pakistan chuan thu dik lo niin a sawi thung a, bomb phurtu indo thlawhtheihna hi Pakistan thlawhtheihnaten an lo hmuh hman leh an umzui avangin mihring chen lohna hmun, ram ruakah an bomb hi thlakin an thlawk kir niin a sawi ve thung a ni.

Reuter reporter-te chuan air strike neih ni, February 26 leh Ningani, February 28 khan Balakot bial hi tlawhin he hmuna chengte an kawmkual nghal a, hemi ṭum pawh hian camp tihchhiat an hmuh loh thu leh, mitthi an hmuh loh thu an sawi. Tualchhung mite chuan thil puak ring tak chu an hriat thu leh, mahse hengte hi ramhnuaia a tlak thu an sawi bawk.

IAF-in bomb 80% in target a fuh tih a sawi

Hetihlai hian Indian Air Force (IAF) chuan Balakot-a JeM camp-a an bomb thlak 80% chuan an target an fuh niin a sawi a, a finfiahna pawh sorkarah a thehlut nia sawi a ni. India Today TV-in a tarlan danin IAF hian Indian airspace-a intelligence aircraft platform aṭanga lak, high-resolution satellite image leh synthetic aperture radar imagery lanna phek 12-a chhah, dossier chu sorkar henah a thehlut tawh niin a sawi. Heng thlalakte hi Balakot airstrike a hlawhtling ngei a ni tih finfiahna a nih thu IAF lam chuan an sawi.

Sipai martar chhungten firfiakte ruang hmuhtir phut

JeM firfiakin Jammu and Kashmir-a Central Reserve Police Force (CRPF) convoy a beihnaa sipai 40 thi zinga Uttar Pradesh state mi, sipai martar pahnih chhungte chuan IAF-ten Pakistan-a JeM camp beiin firfiak eng emaw zat an that nia sawi chu finfiahna pe turin an phut. Sipai martar Pradeep Kumar leh Ram Vakeel chhungte chuan JeM camp-a firfiak thah an ni ngei tih finfiahna rintlak tak pe turin sorkar an phut tih an sawi. Pradeeh Kumar-a nu, Shamli chuan, "India fapa-te tam tak an thi a, lehlamah pawikhawihtu lam thi an awm lo, firfiakte hi tihhlum an nih chuan an ruang thlalakte min hmuhtir rawh se", a ti.