Brazil aiin India ramah Covid-19 kai an tam tawh zawk

Ministry of Health and Family Welfare-in nimina report a tihchhuahah India ramah darkar 24 chhunga Covid-19 hripui kai thar mi 1,68,912 an awm belh leh a, hemi nen hian India ramah hripui kai hmuh chhuah mi vaibelchhe 1.35 awm tawhin, hrilengin a nghawng nat ber dawttu ram ni ṭhin Brazil aiin India ramah hian hri kai an tam tawh zawk.

Nimina sorkar report tihchhuah thleng khan India ramah hri kai mi vaibelchhe 1.35 chuang zet an awm tawh a, thihpui mi 1,70,179 an awm tawhin hri la kai mek mi 12,01,009 an awm bawk a ni.

Sorkar report aṭanga a lan dan chuan darkar 24 chhungin dama puan mi 75,086 an awm a, chutih laiin mi 904-in an thihpui leh bawk a, hri kai tawh zawng zawng zinga mi vbc 1.21 chuang chu an dam leh tawh thung.

Nimina hri kai thar report hi ni khata hri kai hmuh chhuah tam ber ni a ni leh a, India ramah hian a zawnin ni sarih chhung ni khata hrikai hmuhchhuah thar tam ber ni a thleng tawh a ni. Hemi a nih avang hian USA tih loah chuan India ramah hian hri kai an tam ber tawh a, Maharashtra chu a nghawng nat ber state nih chhunzawm zelin darkar 24 chhungin hri kai thar mi 63,294 hmuh chhuah an ni a, mi 349 laiin an thihpui bawk.

India ram khawpui Delhi-ah pawh ni khata hri kai hmuh chhuah tam ber ni thlengin case thar 10,774 an nei a, 48 laiin an thihpui a ni. Hri lengin a nghawng nat ber dawttu ram ni ṭhin Brazil-ah chuan nimin thleng khan case vbc 1.34 chuang an awm tawh a, thihpui erawh India aiin an tam tawh zawk a, mi 3,53,137-in an thihpui tawh thung.

Hetihlai hian hri kai tamna ber ram US-ah chuan hri kai vbc 3.11 chuang an awm tawh a, an zinga mi nuai 5 chuang an thi tawh bawk.

Kumbh Mela
India ramah hian ni khatah hri kai thar nuai chuang awm deuh reng mah se nimin khan Uttarakhand Haridwar-a Ganga lui kamah chuan khawvela sakhuana thila punkhawmna lian ber zinga mi, Kumbh Mela vangin mi tam tak an pungkhawm a, Covid-19 vanga sorkarin dan a siam chu bawhchhiat niin mi nuai chuang zet an pungkhawm.

Reuters-in an tarlan dan chuan police official-te chuan social distancing zawm turin pungkhawmte chu an ngen reng a, mahse thlalak vel aṭanga a lan dan chuan an zawm lem lo a ni.