Jammu bus stand-ah grenade puak Mi 1 thi, mi 30 in hliam an tuar

Jammu and Kashmir-a Jammu khawpui-a BC Road bus stand-ah nimin chhun khan grenade tihpuah a ni a, mi pakhat thiin midang 30 velin hliam an tuar.

Grenade tihpuahna hmun hi mipui lunna lai a ni a, grenade puaka thi leh hliam tuarte hi civil mi vek nia sawi a ni. Inspector General of Police M.K.Sinha chuan hliam tuarte hi damdawi-inah hruai nghal an ni tih sawiin, an zinga mi paruk chu an dinhmun a ṭha lo hle niin a sawi.

IGP chuan chhun dar 12 velah state road transport corporation (SRTC) bus dinglai hnuaiah grenade hi tihpuah a ni a, bus driver leh conductor-te pawh hliam tuar zingah hian an tel niin a sawi. He pawikhawihna thleng hi a hma aṭanga lo ruahman lawk nia a lan thu a sawi bawk.

Nimina grenade puak hi eng pawl mahin an tih niin an la chhal lo. Police-te chuan nimin tlai lam thleng khan rinhlelh mi 12 manin, thu zawhfiah turin an hreng. An mi hren zinga pakhat hi grenade tipuaktu nia rin a ni bawk. Grenade tihpuahna hmun hi mipui tlawh theih lohin khar nghal a ni a, police-te chuan enfiahin ui fing leh forensic expert-te pawh tirh luh an ni tawh bawk.

Nikum May aṭang khan tun ṭum hi firfiakten Jammu-a bus stand area-a grenade an tihpuah ṭum thumna a ni. Nikum December 28-29 khan firfiak nia rinhlelhte chuan local police station building beih nan bus stand-ah grenade an lo tipuak tawh a, kum 2018 May thla khan BC road-ah vek hian grenade tipuakin police pahnih leh civil mi pakhatin hliam an lo tuar tawh bawk a ni.