Sorkarin Rs 20 coin tichhuak dawn

Sorkar laipui chuan cheng 20 thir (coin) thar tihchhuah a nih tur thu Nilaini khan a puang.

Finance Ministry chuan pawisa thir tihchhuah thar tur hi dodecagon ( kil 12 nei) a nih tur thu sawiin, a diameter hi 25 mm a ni dawn a, Rs 10 thir ang bawkin rawng chi hnih, two-toned a ni ang. Rs 20 thir kual pawnlam hi 65 % copper, 15% zinc leh 20% nickel a ni dawn a, a ring chhunglam inner/center hi 75% copper, 20% zinc leh 5% nickel a ni thung ang.

Pawisa thir tlang hi Rs 10 thir angin a kak/kir a awm dawn lo thung a, a rih zawng hi gram 8.54 a ni ang.

Rs 20 thir tihchhuah turah hian Lion Capital of Ashoka thla tihlan niin, a hnuaiah "Satyamev Jayate' tih ziah a ni dawn a, sir vei lamah Hindi-in 'Bharat' tih ziah a ni ang a, a ding lamah English-in 'India' tih ziah a ni bawk dawn a ni. Coin hnung lamah rupee symbol leh a pawisa hlut zawng ziah lan a ni dawn bawk.

Kum 2009 March thla khan Rs 10 thir hmasa ber tihchhuah a ni a, hemi hnu hian Rs 10 coins hi chi hrang 13 siam a ni tawh a ni. Mahse cenral bank chuan coin chi hrang hrangte hi hman theih leh pawm vek a nih thu a sawi.