SC-in Ayodhya buaina media-tion committee chinfel turin ti

Supreme Court chuan Ayodhya-a Ram Janmabhoomi-Babri Masjid ram inchuh buaina chu court-in a ruat mediation committee chinfel turin nimin khan a ti.

Mediation hmanga ram inchuh buaina chinfelna tur hi Justice Khalifullah (Retd.) kaihhruaina hnuaiah neih a ni dawn a, member dang pahnih Sri Sri Ravi Shankar leh senior advocate Shriram Panchu te an awm bawk ang. Anni hian an duh chuan member dang pawh an lakbelh thei dawn a ni.

Mediator-te hian karleh Zirtawpni aṭangin Faizabad-ah an sawiho ṭan dawn a, petitionter-te an kawm dawn a ni. An hmalakna leh thil relte chu camera-a record vek a ni ang, tiin SC chuan a sawi. Report hmasa chu kar li chhungin an thehluh a ngai dawn a ni. He buaina hi kar riat chhunga chinfel hman tura tih an ni bawk.

Ayodhya-a ram inchuh hi acre 2.77-a zau niin, kum zabi 16 hunlaia Mughal emperor Babur-a sak mosque dinna ṭhin a ni. Mahse Hindu pawlte chuan mosque sakna hi Lord Ram pianna hmun, temple chhe tawh awmna hmun niin an sawi thung a, kum 1992 khan Hindu activist-ten mosque hi an hal a, hemi hnua Hindu leh Muslim te inkara buaina chhuaka mi 2,000 chuang zet an thi. Hemi hnu hian he ram hi Hindu leh Muslim te hian an inchuh zui reng a ni.

Mediation :

Mediation hi court thlen ngai kher loa buaina chinfelna kawng pakhat a ni. Neutral third party chuan buaina neite inkarah inremna kawng zawnga inbiak neihpuiin, an duhdan leh thil phut te a ngaihtuahsak a ni. An duhdan ang tipuitlinga inremna siampui dan a zawnsak a ni. Mediator atan hian mithiam, experience nei tha takte dah an ni ṭhin. Mediation hi Industrial Disputes Act, 1947 hnuaia buaina chinfelna method pakhat, dan ang taka pawm a ni.