LS inthlanah tharum thawhna leh sum lengvel a hluar dawn : Ex-CEC EC-in inthlan hun tur puang hnai

Chief Election Commissioner (CEC) hlui TS Krishnamurthu chuan Lok Sabha inthlanpui lo awm turah kum dang aiin sum lengvel a nasa dawn a, political party te inkarah inhuatna leh tharum thawhna pawh ṭum dang aiin a hluar dawn niin a sawi.

Kum 2014 Lok Sabha inthlanpui kha Krishnamurthu kaihhruaina hnuaiah hian neih a lo ni tawh a ni. CEC hlui chuan kumin inthlanpui neih tur chungchangah Election Commission-in inthlan neih ni tur a puan tlai vanga eptu party-ten an sawiselna leh rawtna an siamte chu a sawizawm duh lo a, EC chuan state hrang hrangte dinhmun a enfiah phawt a ni, a ti.

Krishnamurthu chuan inthlan neih tura atana political party hrang hrang inbeih chhoh dan aṭangin, inthlanpui lo awm turah hian tharum thawhna leh inhuatna a hluar dawn a, hemi kara model code of conduct lo kenkawh chu EC tan pawh chona lian tham tak a tling thei dawn a ni, a ti. Hemi rual hian EC chu heng chona lo hmachhawn turin a ring tawk tih a sawi nghal bawk.

EC meeting nei :

Nimin khan EC chuan meeting neiin, Lok Sabha inthlan neih hun tur hi an ngaihtuah nia rin a ni. Meeting-ah hian CEC Sunil Arora, Election Commissioner pahnih bakah top official-te an tel. EC hian vawiinah emaw, karleh tir lamah emaw inthlan neih hun tur hi a puan hman tawh beisei a ni.

Lok Sabha inthlanpui hi April-May chhungin thawh 7-8 vela neih rin a ni. Inthlanpui neih tur atan EC hi an inpuahchah nasa tawh a, vote thlakna tura, electronic voting machine leh paper trail machine-te pawh Lok Sabha constituency 543-a polling station nuai 10 dawna thawn mai theih turin buatsaih an ni tawh bawk.