Mamata Banerjee-in sit-in protest a nei

West Bengal Chief Minister leh Trinamool Congress chief Mamata Banerjee chuan nimin khan Kolkata-ah Election Commission-in darkar 24 chhung campaign a khap avangin duh lohna lantirna atan sit-in protest a nei.

Thla hmasaa a inhliamna avanga wheelchair hmang mek Mamata Banerjee chuan nimin chawhma dar 11:40 velah khan Kolkata-a Mayo road-ah kalin Mahatma Gandhi lim awmna hmunah sit-in protest a nei a ni.

EC thutlukna duh lohna a lantirnaah hian TMC hruaitu dang emaw amah thlawptu emaw dang hmuh tur an awm lo a, TMC leader pakhat chuan an hotunu sit-in protest neihna hmunah chuan party hruaitu dang kal phal an ni lo tih sawiin, hei vang hian amahin a ṭhu ta niin a sawi.

EC chuan Thawhṭanni zan dar 8 aṭang khan darkar 24 chhung Mamata hi campaign neih a khap a, hei hi central force kalh zawng leh sakhuana lam hawi zawnga a thusawi niin a sawi. Nizan dar 8 hnu lamah erawh kha chuan rally pahnihah thu a sawi dawn niin TMC lam chuan an tarlang.

Mamata Banerjee chuan EC-in campaign an khap chu dodalin twitter lamah pawh an thupek tihchhuah chu ram danpui kalh a nih bakah democracy kalphung a ni lo, tiin a sawi.

EC hian Bharatiya Janata Party (BJP) leader Rahul Sinha pawh darkar 48 chhung campaign neih a khap ve bawk a, ani pawh hi central force chungchanga a thusawi avangin campaign khap sak a ni.