Kum khatah Sputnik V dose mtd 850 siam dawn

India sorkarin a ram chhunga Covid-19 vaccine hman tura a pawm pathumna ni ta Russian siam Sputnik V chu India ramchhungah dawmdawi siamtu firm pangain an siam dawn a, kum khatah dose maktaduai 850 an siam dawn a ni.

Sputnik V hi kum khata an siam tur bakah hian April thla tawpah hi chuan dose eng emaw zat pek chhuah hman an tum bawk.

India drug regulator Drugs Controller General of India (DCGI) chuan Subject Expert Committee of the Central Drugs Standard Control Organization hnen aṭanga phalna a hmuh hnuah Thawhṭanni khan Russian vaccine hi India rama hman turin a pawm a ni.

India-ah chuan Dr Reddy institute-in an siam Sputnik V hi 91.6% velin a thawk hlawhtling thei nia tarlan niin Dr Reddy Institute phei chuan February thlaah daih tawh khan emergency-a hman turin a lo ruahman tawh a, tunah hian clinical trial thawh thumna neih a ni tawh bawk.

Russian Direct Investment Fund (RDIF) chuan thuchhuah an siamah an ram siam vaccine pawmtu ram zingah India ram chu mihring tam berna a ni nghal tih sawiin ram 60-ah pawm a ni tawh a, chung rama chengte chu khawvel mipui awm zawng zawng aṭanga 40% an ni phak tih an tarlang.

India rama Sputnik V siam tura RDIF-in inremna a siampuite chu Gland Pharma, Hetero Biopharma, Panacea Biotec, Stelis Biopharma leh Virchow Biotech-te an ni a, April thla tawpa dose hmasa ber pek chhuah tum a nih thu hi RDIF CEO Kirill Dmitriev chuan sawiin, April-ah an pe hman chiah lo a nih pawhin May thla tir lamah chuan pek chhuah hman ngei a ni dawn tih a sawi.

Vaccine dang panga pawm leh mai thei
Sorkar laipui chuan Covid-19 nasa taka a len mek avangin kumin chhung hian Sputnik V bakah hian vaccine dang panga a pawm thar rin a ni.

Sorkarin ram dang siam vaccine a pawm mai tura rinte chu Johnson and Johnson (Bio E), Zydus Cadila, Serum vaccine Novavax leh Bharat Biotech nasal vaccine-te an ni. National Expert Group on Vaccine Administration for Covid-19 (NEGVAC) chuan vaccine pawm thuai tura an duh, ram dang pawhin an hman tawh leh World Health Organization pawhin emergency-a hman tura list a siamte chu pawm turin sorkar hnenah thurawn an pe a ni.

Maharashtra, Punjab, Delhi, Telangana leh Rajasthan leh state dang eng emaw zat chuan vaccine an tlachham ṭan tawh tih an sawi. Hetihlai hian India ram chu khawvela vaccination programme lian ber kalpuitu a ni mek a, mi vaibelchhe 10 chuangin vaccine hi an la tawh.