Darkar 24 chhungin hri kai thar nuai 1.84 leh Hripui vanga thi 1,027 an awm

India ramah Covid-19 hri leng chuan zual lam a la pan zel a, hri kai hmuh chhuah tam ber ni a thleng chho fo a, Thawhlehni pawh khan ni khata hri kai thar tam ber ni lehin, hemi ni hian hri kai thar mi 1,84,372 an awm.

Ram pumah Covid-19 hri kai hmuh chhuah tawh hi vaibelchhe 1.38 chuang an awm tawh a ni. Ni li chhung chu a zawnin hri kai thar hi nitin mi nuai 1.5 chuang an awm tawh a, ni riat chhung a zawnin hri kai thar nitin nuai khat chuang an tling ziah tawh bawk.

Thawhlehni khan hripui vanga thi mi 1,027 awm belh lehin, hei hi India ramah thla ruk chhunga hripui vanga ni khata thi an tam ber ṭum a ni. Hri kai mek, active case pawh an pung chak hle a, nuai 13 chuang awm tawhin kumin February 12 kha chuan active case hi nuai 1.3-ah a tlahniam hman tawh a ni.

India ramah Covid-19 hri leng thawh hnihna a thlen hnuah hripui vanga thi pawh hi an pung chak hle a, hripui thihpui hi mi 1,72,085 awm tawhin heng zinga 58,526 hi Maharashtra state-a mi an ni. Hetih lai hian health ministry chuan Covid-19 vanga thi zinga 70% chuang chu natna benvawn nei an ni tih a sawi.

Maharashtra-ah inkharkhip puan a ni
Maharashtra chief minister Uddhav Thackeray chuan coronavirus nena indona chu ṭan a ni, tia sawiin ni 15 chhung an state-ah inkharkhip puan a ni tih a sawi.

Uddhav Thackeray chuan inkharkhip an puan chu inkharkhip pum hlum (complete lockdown) ni lo mah se nizan dar 8 aṭang khan 'janta curfew' khauh taka kalpui a nih dawn thu a sawi a, he janta curfew hian May 1 zing dar 7 thleng a awh dawn a ni, a ti.

Social media kaltlanga an state chhung mite hriat tur pawimawh a sawinaah CM Thackery chuan medical oxygen leh khum an neih tlem tawh bawkah Remdesivir mamawhna a sang zel tih sawiin, eptu party-te leh civil society-te chu an hmalakna thlawp turin a ngen bawk a, "Tun hun hi politics ngaihtuah hun a ni lo," tiin a sawi.

Thackery chuan class 10 leh 12 board exam pawh an sorkar chuan tihkhawtlai mai an tum thu a sawi bawk.

Maharashtra-ah hian nimina sorkar report tihchhuahah chuan hri kai thar mi 60,212 lai an awm leh a, mi 281 an thi leh bawk a ni. Inkharkhip hi puang mah se nitin mamawh hrang hrangte lakluhna leh lei theihna dawrte chu kharkhip an ni ve lo.