Yogi Adityanath-in Covid-19 a kai

Uttar Pradesh chief minister Yogi Adityanath chuan nimin khan Twitter kaltlangin Covid-19 a kai tih a puang a, a inkhunghrang nghal tih a sawi.

Yogi Adityanath official eng emaw zatte chuan Thawhlehni khan hripui hi an kai tih hriat chhuah a ni a, hemi hnu hian amah pawh hian a kai tih hriat chhuah a ni ve leh ta a ni. Kum 48 mi UP chief minister chuan an state chhunga sorkar hnathawh hrang hrang chu kalphung pangngaiin a kal reng tho tih sawiin tunhnaia amah hnaia awhte chu Covid-19 test la ngei ngei turin a chah bawk.

"Symptom ka nei nia a lan avangin Covid test ka la a, ka postive tih hriat chhuah a ni. Ka inkhung hranga physician-te thu ka zawm bawk. Virtual-in hna ka thawk a ni," tiin Twitter-ah chuan a tarlang.

Akhilesh Yadav pawhin hri a kai
Yogi hma chiahah UP CM ni ṭhin Samajwadi Party chief Akhilesh Yadav pawhin Covid-19 a kai tih hmuh chhuah a ni bawk.

Akhilesh Yadav hian thla tir lamah khan Lucknow-ah Covid-19 vaccine dose hmasa ber a la tawh a, mahse hripui a kai tih hi hmuh chhuah a ni leh ta tho a ni.