CBI-in Maha minister hlui Anil Deshmukh thu zawtfiah

Maharashtra home minister hlui, Anil Deshmukh chu Mumbai police commisioner hlui Param Bir Singh-a'n eirua a puh chungchangah nimin khan Central Bureau of Investigation (CBI) chuan thu an zawtfiah.

Anil Deshmukh hi Santacruz, Mumbai-a DRDO guest house-ah CBI team-ten nimin chhun khan thu hi an zawtfiah a ni.

Mumbai Police Commissioner post aṭanga ban a nih hnuah Param Bir Singh hian minister hlui Deshmuk hi eiruknaa inhnamhnawiha puhin, assistant police inspector Sachin Waze hnenah Mumbai-a bar leh restaurant-te hnen aṭanga pawisa dil a, thla khatah cheng vaibelchhe 100 chuang dil chhuak turin a ti niin a puh. Mahse a puhna hi thu dik lo a nih thu Deshmukh chuan a sawi.

Param Bir Singh-a'n Anil Deshmukh a puhna chungchang hi CBI hnenah chhui chiang turin kar liam ta khan Bombay High Court chuan a hrilh a ni. CBI hian Param Bir Singh, Sachin Waze, deputy commissioner of police Raju Bhujbal, assistant commissioner of police Sanjay Patil, advocate Jayshree Patil leh hotel neitu Mahesh Shetty te thu an lo zawtfiah tawh bawk. Anni bakah hian Deshmukh-a personal assistant Kundan Shinde leh personal secretary Sanjeev Palande-te pawh Pathianni khan thu an zawt tawh bawk a ni.