Lok Sabha : House of the People ECI-in inthlanpui neih hun tur puang

Election Commission of India (ECI) chuan 17th Lok Sabha inthlanpui neih hun tur chu nimin tlai khan a puang.

Inthlan hi thawh sarihah neih a ni dawn a, April 11- May 19 chhungin ngeih a ni ang a, May 23 ah result puan a ni ang. Inthlan neih hun tur puan a nih tak avangin nimin aṭang khan model code of conduct chu hman ṭan nghal a ni.

Parliament lower house, Lok Sabha (House of the People)-ah hian seat 545 awmin, ruat seat pahnih member tih loh, member dang 543 chu mipui thlan chhuahte an ni.

Lok Sabha term hi kum nga a ni a, tun term kal lai mek 16th Lok Sabha hun hi June 3 hian a tawp dawn a ni. An term zawh hma hian council of minister-te thurawn angin President chuan House hi a ṭhiat thei a ni.

Constitution in House member awm theih zat san ber tura a ruat chu 552 niin tunah hian seat 545 a awm mek a, heng zinga seat 543 chu mipuite thlan chhuah niin, President-in Anglo-Indian Community aṭanga a ruat seat 2 a awm bawk.

House-a Leader of Opposition dinhmun chelh tur chuan eptu party chuan seat awm zat aṭanga 10% seat an neih phak a ngai. Lok Sabha seat awm zinga 131 (24.03%) chu Scheduled Caste tan 84 leh Scheduled Tribes tan 47 dah a ni. Lok Sabha hian TV channel hran, Lok Sabha TV a nei a, headquarters chu Parliament compound chhungah a awm a ni.

Kum khat chhungin Lok Sabha hian session vawi thum a nei ṭhin a, chung te chu -

* Budget session : February -May

* Monsoon session : July - September

* Winter sessin : November - mid December

Session hi dan tlangpuiin chawhma dar 11 aṭanga chawhnu dar 1 leh dar 2 aṭanga tlai dar 6 chhung neih ṭhin a ni. A tul dan azirin chawlh lawk awm lo leh, dar 6 hnu lamah pawh neih an ni ṭhin. Inrinni leh Pathianni bakah, holiday-ahte rorel inkhawm hi neih a ni lo tlangpui bawk.

Lok Sabha constituency ramri ṭhen chungchang hi Boundary Delimitation Commission of India in kum sawm danah Indian census behchhanin a ngaihtuah ṭhin a, a ngaihtuah hnuhnun ber chu kum 2011 khan a ni.

Kum 1952, May 13 khan Lok Sabha session hmasa ber neih a ni a, Speaker hmasa ber chu G.V. Mavalankar niin Deputy Speaker hmasa ber chu M.Ananthasayanam Ayyangar a ni.

Kum 2014-a 16th Lok Sabha inthlanpui neihah khan BJP chuan seat awm zat 543 aṭangin party malin seat 282 a la a, a thawhpui party dangte nena BJP kaihhruai National Democratic Alliance (NDA) hminga seat an lak zat chu 336 a tling a ni. 16th Lok Sabha-ah hian Speaker chu Sumitra Mahajan niin M.Thambidurai chu Deputy Speaker a ni.