Chennai-ah door-to-door screening nei dawn

Tamil Nadu sorkar chuan vawiin aṭang hian an state khawpui, Chennai-ah coronavirus kai dapchhuah runpui neih a tum a, in tinah kalin screening an nei dawn. 

He hna thawk tur hian hnathawktu 16,000 chhawr an ni dawn a, training pawh pek vek an ni. Hnathawktute hi personal protective equipment (PPE) nena inthuamin an kal dawn a, nitin report an thehlut ang.

Chennai khawpuiah hian building maktaduai 10 chuang a awm a, hengte hi ni 90 chhungin tlawh chhuah hman vek tum a ni. He khawpuiah hian Covid-19 kai hi mi 88 hmuh an ni tawh.

Mi vaibelchhe sarih chuang chenna, Tamil Nadu-ah hian mi 4,248 sample chauh test a la ni a, test zinga a tam zawk hi international passenger leh, hri kai tawhte nen inkungkaihna neite an ni. Mi 90,541 chu mahni inah inkhung hran tir mek niin, damdawi-inah mi 1,681 te dah hran an ni bawk. 

Chief minister K Palaniswami chuan prime minister Narendra Modi hnenah hri leng dona tura hma an laknaah test kit, ventilator leh mask an mamawh ang pe tur leh, sum lama puihna cheng vaibelchhe 9,000 pe turin a ngen. Sakhaw hrang hrang hruaitute hnenah pawh ngenna siamin, sakhaw bil inpuhmawhna lam hawite, hri kaite huatna leh thinhrikna lawm hawia thu sawi lo turin a ngen.