Hri kai thar tam ber ni thleng leh Ni khatah hri kai thar nuai 2 chuang awm
India ramah Covid-19 hri kai thar tam ber ni a thleng fo a, Nilaini pawh khan hri kai thar nuai hnih chuang awm lehin, ni khatah hri kai hmuh chhuah tam ber ni a ni leh.
Ninga chhung chu a zawnin ni khatah hri kai thar nuai 1.5 chuang an awm tawh a, ni kua chhung a zawnin nitin hri kai thar nuai khat chuang an awm ziah tawh bawk.
Khawvela hri kai tamna ber, US-ah ni khatah hri kai thar nuai khat aṭanga nuai hnih an tlin chhoh nan ni 21 hun an hman laiin, India ramah chuan ni khata hri kai thar nuai khat an tlin aṭanga ni 11 hnu lekah ni khatah nuai hnih hri kai hmuh chhuah hi an awm hman a ni.
Nilainia Covid-19 hri kai hmuh chhuah thar hi 2,00,739 niin India rama coronavirus hri kai hmuh tawh hi vaibelchhe 1.4 an tling tawh a ni. Hemi ni vek hian hripui vanga thi mi 1,038 awmin, a zawnin ni hnih chhung chu hri vanga thi hi 1,000 chuang an tling tawh. Nilaini kha nikum October 2 hnua ni khatah hri vanga thi an tam ber ni a ni bawk.
Delhi-ah weekend curfew puang
Delhi chief minister Arvind Kejriwal kaihhruai AAP sorkar chuan khawpui chhungah hri kai an pun belh zel avangin hri darh tur venna kawng khat atan weekend curfew puan a ni tih nimin khan a puang.
Zirtawpni zan dar 10 aṭanga Thawhṭanni zing dar 6 thleng curfew hi puan a ni dawn a, weekly market pawh municipal zone-ah pakhat zel hawntir a ni dawn bawk a ni.
CM chuan hri kai pung zel mah se khawpui chhungah damdawi-in khum an la indaih ṭha tih sawiin, data hnuhnung bera a landanin damdawi-in hrang hrangah khum ruak 5,000 vel a la awm a ni, a ti.
Mumbai-ah hri kai enkawl nan 5-star hotel hmang dawn
India rama hri kai tam leh thihpui tamna ber state, Maharashtra khawpui Mumbai-ah chuan hri kai an pun chak avangin Covid-19 kai, taksa lama harsatna lian tham nei lo te enkawl nan Mumbai hospital-te chuan 5-star hotel an hmang dawn.
Brihanmumbai Municipal Corporation (BMC) chuan private hospital leh 4/5 star hotel-te hian inzawmna siamin, hospital-a hri kai enkawl, harsatna lian tham nei lote chu hotel-ah hian sawn an ni dawn a, mahse hei hi doctor-ten an pawmpui zel a ngai dawn tih a sawi. Covid kai enkawlna turin hotel-ah hian a tlem berah room 20 tal a awm a ngai dawn a, 24/7 medical service a awm a ngai bawk ang.
Rajasthan khawpui zawng zawngah zanin aṭangin night curfew puang
Rajasthan sorkar chuan Covid-19 hri kai an pun zel avangin zanin aṭangin state chhunga khawpui lian zawng zawngah zan lam curfew a puang dawn a, hei hian April 30 thleng a awh ang.
Curfew hi zan dar 6 aṭanga a tuk zing dar 5 thleng hman ṭhin a ni dawn a,thil zawrhna hmun te chu tlai dar 5 thleng hawn phalsak an ni dawn a, sikul leh zirna in dangte chu khar vek tura tih a ni thung. Sumdawnna hmunpuia thawk te chu curfew hmaa an hnathawhna hmun thleng hman vek tura tih an ni bawk.
Ashok Gehlot a kaihhruai sorkar chuan punkhawmna hmuna awm thei zat bithliah pawh siam tharin, innneihnaah mi 50 chin an tel phalsak a ni a, sport leh public event-te erawh huaihawt khap a ni.