Muslim inkhawma telte chhui chhunzawm zel

March 13-15 inkara Delhi chhim lam, Nizamuddin venga mosque-a inkhawmpui chhima kal muslim hote zawn chhuah hna chu Cellphone Data hmangin Delhi police Ten an la chhui chhunzawm zel. 

He inkhawmpuia kal mi tam tak chu hriat chhuah tawh an ni a, ram dang aṭang leh ram chhung aṭangin mi 9000 vel an tel nia rin a ni. Delhi Police-te hian he huna kal muslim-te zawn chhuah hna hi March thlaa an GPS location hmangin an awmna tur chin an chhui zui char char a, an Cellphone Data hmangin an umzui mek bawk a ni. 

Delhi police-te hi state police-te chuan an bial chhungah ṭheuh a theih ang angin an lo pui bawk. Nizamuddin venga inkhawmpui chhima kal muslim-te hi India rama Covid-19 hri darhna pui ber pakhatah ngaih a ni . Heng zinga kal mi 200 chuangin hri an kai tih hriat a ni a, hei vang hian ramchhunga hri kai hi an pun belh bawk nia sawi a ni.