Chief Election Commissioner thar Sushil Chandra

Sushil Chandra chu Chief Election Commissioner thar niin, tunkar tir lam khan a hna thar hi a zawm. CEC 24-na a ni.

Kum 2019, February 14 khan election commissioner thar atan Chandra hi ruat a lo ni tawh a, Thawhlehni khan CEC aṭanga Sunil Arora a chawlh tak avangin Chandra hian a hna thar hi a zawm ve nghal a ni. He hna hi May 14, 2022 thleng a chelh ang.

CEC thar Chandra hnuaia hian Election Commission of India (ECI) chuan Goa, Manipur, Uttarakhand, Punjab leh Uttar Pradesh-ah assembly inthlan a buatsaih hman dawn a ni.

Chandra hi Indian Revenue Service 1980 batch a ni a, kum 2020 February 18 aṭang khan Delimitation Commission ex-officio member a ni bawk. Income Tax Department hnuaiah kum 39 chhung post hrang hrang a chelh a, kum 2016, November 1 khan Central Board of Direct Taxes (CBDT) Chairman atan ruat a lo ni tawh bawk.