Khawmpui chhimtu Malaysia mi pariat man
Nimin khan Delhi Indira Gandhi International Airport-ah thla hluia Nizamuddin-a muslim inkhawmpui chhima kal Malaysia mi 8-te chu man an ni.
Heng mi an man te hi Delhi police-te leh health department kuta hlan nghal an ni bawk. March thla tawp lama PM Modi-a'n ram puma inkharkhip a puan avangin international flight tihtawp lailawk rih a ni a, mahse ramdang ten India rama an mi leh sa tangkhangte an lakchhuah a nan special flight erawh thlawh tir a ni thung.
Malaysia mi 8 an man te hi airport-a an man hma hian Delhi khawi hmunah emaw an biru nia rin a ni. Heng mite hi Malindo Air relief flight-a India chhuahsan an tum laiin, airport-ah hian man zui an ni ta a ni.
Inkhawmpuia kal zinga ram dang mi 960-te chu blacklist-a dah an nih bakah visa tih tawpsak an nih thu home ministry chuan a lo tarlang tawh bawk.
HP CM-in test neih vek turin ngen
Himachal Pradesh chief minister Jai Ram Thakur chuan a state aṭanga Tablighi Jamaat member, Delhi-a khawmpuia telte chu in test vek turin a ti a, thu zawm lo chungah chuan action lak a ni dawn tih a sawi. Inrinni khan Himachal Pradesh-ah hian Jamaat member pasarih test zinga pathum chuan Covid-19 hi an kai tih hriat a ni.