Lok Sabha election 2019: Kum 18-19 mi vote nei thar vaibelchhe 1.5 chuang awm

Election Commission of India (ECI) chuan Pathianni tlai khan Lok Sabha 2019 inthlanpui neih hun tur a puang a, inthlan hi thawh sariha neih tur niin April 11 leh May 19 inkarah neih a ni ang. Vote tlate hi May 23-ah a rualin chhiar tur a ni a, result puan nghal a ni dawn bawk.

Kumin inthlanpui neih turah hian vote nei thar, kum 18-19 mi vaibelchhe 1.5 chuang an awm a, hei hi vote nei awm zat aṭanga 1.66% a tling. January thlaa e-roll tihchhuahah ramchhunga vote nei zat hi mi maktaduai 900 an ni a, kum 2014 inthlanpuiah khan vote nei maktaudai 814.5 awmin kum nga chhunga vote nei thar awm zat hi maktaduai 84 chuang a ni.

Election Commission chuan nihna thlakthleng, transgender-te chu kum 2012 aṭang khan 'Others' tih hnuaiah an inziahluh a phalsak tawh a, 'others' gender hnuaia voter ziahluh zat hi 38,325 an awm a ni. Poll panel chuan rampawna Indian mi awmten vote an neih ve theihna turin Parliament chuan Representation of the People Act, 1950 chu a siamṭha tih a sawi. Ramdanga cheng, electoral roll-a ziah luh hi 71,735 an awm mek a ni.

Election Commission chuan Lok Sabha inthlan neih tura chuh tum, candidate-te chu TV leh newspaper darhzau takah thubuai an neihte vawi thum tal puangzar turin a ti. Hemi chungchanga hriattirna hi kum 2018, October 10 khan tihchhuah a lo ni tawh a, mahse Lok Sabha inthlan neih tur atan chuan tun ṭum hi hman a nihna hmasa ber tur a ni.

Hriattirna tihchhuahah hian candidate-te bakah an awmna political party-te pawh candidate atana an ruat criminal record-te pawh puangzar tura tih an ni bawk.

State leh Union Territory hrang hrangte Lok Sabha seat neih zat hi People Representative Act behchhanin, mipui tam dan azirin siam a ni. Mi nuai 10-ah seat khat zel anga ruahman a ni. Hemi rual hian state/UT, mi nuai 10 aia tlem awmna pawh ni se seat pakhat tal chu an nei ngei tura tih a ni thung.

Tuna state/UT tena Lok Sabha seat an neih zat hi kum 2001 chhiarpui neih behchhan niin, kum 2002-a Constitution siamṭhat (84th amend)-ah Lok Sabha constituency-te hi kum 2026 hnua census neih leh hmasak ber hma chu siam danglam loh tur a tih a ni. Hei vang hian tuna constituency awm zat hi kum 2026 thleng chuan hman chhunzawm a ni ang.

State/UT zingah Uttar Pradesh chu LS seat nei ngah ber niin seat 81 a nei a, seat 40 aia tam nei state dangte chu Andhra Pradesh 42, Bihar 42, Maharashtra 48 leh West Bengal 45-te an ni. Member pakhat chauh nei hi state/UT pakua awmin chungte chu - Mizoram, Nagaland, Sikkim, Andamand and Nicolar Islands, Chandigarh, Dadra and Nagar Haveli, Daman and Diu, Laskhadweep leh Puducherry-te an ni a, Union territory zingah Delhi chuan seat pasarih a nei.