Pulwama beihna ruahmantu bera puh kaphlum

Jaish-e-Mohammed (JeM) firfiakin February 14-a Jammu and Kashmir-a Central Reserve Police Force (CRPF) convoy a beihna ruahmantu bera puh, Mudasir Ahmed Khan, 'Mohd Bhai' tih bawk chu Pathianni khan Kahsmir chhim lama Tral bialah security force-ten an kaphlum.

Pathianni zana Tral biala security force leh firfiakte inkahna thlengah firfiak pathum kahhlum an ni a, an zingah hian Mudasir Ahmed Khan hi a tel niin an sawi.

Mudasir Ahmed Khan hi JeM firfiak pakhatin CRPF convoy bei a, a motora a bomb phurh a tihpuah avanga sipai 40 zetin nunna an chan phahnaah khan, thihchilh bomb tipuaktu motor hman tur leh a bomb phurh turte pawh lo ruahmantu ber nia sawi a ni. CRPF convoy beitu Adil Ahmed Dar chu Khan hian pawikhawihna a thlen hma hian a lo be fo a ni.

Khan hi kum 23 miin Pulwama-a cheng a ni a, electrician a ni. Kum 2017 khan JeM hi a zawm a, underground worker angin a awm. Mahse a hnuah Noor Mohammed Trantey-a kaihhruai firfiak pawl dangah a inhmang zui leh bawk. Nikum February thlaa Sunjawan-a army camp beihnaah pawh khan a inhnamhnawih a, hei bakah hian hemi kum vek January thlaa Lethpora-a CRPF camp beihnaah pawh a inrawlh bawk nia sawi a ni.

Intelligence agency-te chuan Kashmir Valley-ah Pulwana-a pawikhawihna ang kha fifiakten thlen leh an la tum niin an sawi. Pulwama beitu, JeM firfiak pawl chuan Jammu and Kashmir-a pawikhawihna dang thlen turin mi panga/paruk vel training an pe mek nia thu an dawn thu an sawi.