Lok Sabha election : EC-in sum hman dan endiktu tur high-powered committee din

Election Commission chuan Lok Sabha inthlanpui lo awm turah dik lo taka sum chelek awm enfiah leh vengtu tur high-level committee a din.

High-powered committee hi "Multi-department Committee on Election Intelligence" tih a ni dawn a, Central Board of Direct Taxes (CBDT), Central Board of Indirect Taxes, Enforcement Directorate, Directorate of Revenue Intelligence, Central Economic Intelligence Bureau leh Financial Intelligence Unit hotute an tel dawn a ni.

Anni bakah hian BSF DG Rajni Kant Mishra, CRPF DG Rajeev Bhatnagar, CISF DG Rajesh Ranjan, Sashastra Seema Bal DG S Deswal, Narcotics Control Bureau DG Abhay Kumar, RPF DG Arun Kumar leh Bureau of Civil Aviation Security DG Rakesh Asthana-te pawh member-ah ruat an niang.

Committee hi inthlanpui lo awm turah dik lo taka sum hman awm tur veng a, inthlan felfai leh dik tak a awm theihna tura Election Commission in a ruat a ni a, inthlan vuakvet chhunga ramchhung hmun hrang hrang, state tin leh ramri-ahte dik lo taka thiltih thleng ṭhin veng tura tuam chhuah vek a tum a ni.

Thla 2-3 kalta chhunga bank account-a sum dahte pawh zirchiang turin committee hian senior bank official-te dah tel tum an ni bawk.

He committee hian a bikin chhim lam state pali - Tamil Nadu, Andhra Pradesh, Karnataka leh Telananga-te an vil uluk zual dawn nia sawi a ni a, heng state-ahte hian tunhnai inthlan an neihah sum a leng nasa, vote leina sum an inpe nasa hle nia sawi a ni.

Election Commission chuan mipuite chu Commission-in a siam, 'c Vigil' app chu hmang ṭangkai tura chahin, vote leina atana sum, zu leh thildang sem an hriatte, inhuatna chawk tho thei zawnga thu sawi awmte chu he app hmang hian report zel turin an chah. EC-in inthlan neih hun tur a puan ni, Pathianni aṭang khan ram pumah model code of conduct hi hman ṭan nghal a ni.

India ram inthlan senso a hautak
India ram inthlan hi khawvelah pawh inthlan senso hautak zingah a tel a, kumina Lok Sabha inthlanpui neih tura senso tur hi cheng tluklehdingawn 500 (dollar tluklehdingawn 7) vel tling tura chhut a nih thu New Delhi-a Centre for Media Studies chuan a tarlang. Kum 2016-a US President leh Congress inthlanah khan dollar tluklehdingawn 6.5 vel sen a ni.

CMS chuan kum 2014 Parliament inthlanpuiah khan dollar tluklehdingawn 5 vel hman a ni a, kuminah chuan sum sen zat hi 40% vel zetin a pung dawn niin a chhut. CMS chairman N.Bhaskara Rao chuan inthlan puala social media, zinna leh advertising lama sum sen hi nasa takin a pung dawn niin a sawi.

Lok Sabha inthlanpui hi April 11 aṭanga neih ṭanin thawh sarih-ah neih a ni dawn a, May 19-ah a thawh hnuhnung ber neih a ni ang. May 23-ah vote tla hi chhiarin result puan a ni ang.