Hri kai thar nuai 2.17 awm belh leh
India ramah nitin hri kai thar an pung zel a, Ningani khan Covid-19 hri kai thar mi 2,17,353 hmuh belh lehin, ni khatah hri kai thar tam ber ni a ni leh.
Ni hnih chhung chu hri kai hmuh thar hi nuai hnih chuang ve ve an awm tawh a ni. India ramah hri kai thar an pun chhoh chak avangin tun kar tir lam khan khawvela hri kai tamna ram pahnihna, Brazil-a hri kai zat chu a lehpel tawh a ni.
Ningani vek khan hripui vanga thi mi 1,185 an awm leh bawk a, nikum June 17 hnua ni khata hripui vanga thi an tam ber ni a ni. Ram chhunga Covid-19 hri vanga thi hi 1,74,308 an tling tawh.
Hri kai hmuh thar mi nuai hnih chuang zinga 79.10% hi state 10 - Maharashtra, Uttar Pradesh, Delhi, Chhattisgarh, Karnataka, Madhya Pradesh, Gujarat, Kerala, Tamil Nadu leh West Bengal-a mite an ni. Maharashtra chu hri kai thar tamna ber niin, Ningania hri kai thar hmuh chhuah hi 61,695 an ni. Uttar Pradesh-ah hri kai thar 22,339 leh Delhi-ah mi 16,699 an awm bawk.
Delhi-ah complete lockdown puang turin ngen
Delhi chief minister Arvind Kejirwal-a'n hri darh tur venna atan khawpui chhungah weekend lockdown puan a nih thu a sawi hnuah, Confederation Of All India Traders (CAIT) chuan ni 10 chhung complete lockdown puan turin sorkar an ngen.
Sumdawng pawl hian Delhi khawpuia hri inkaidarhna khaidiat chhu chat a, boruak a pangngai leh theihna tur chuan ni 10 tal complete lockdown puan a ngai tih sawiin, sorkar chuan huaisen taka thutlukna a siam a ngai a ni, an ti. CAIT chuan khawpui chhunga sumdawng pawl hrang hrangte chu meeting a neihpui dawn a, lockdown puan chungchangah an ngaihdan te sawipuiin, a ṭul a nih chuan dawr khar vek tura an ngen tur thu pawh an sawi.
Delhi khawpuiah hri kai an pung chak hle a, venhim hna thawktu police zingah pawh hri kai an awm belh zel a, tun hnaiah police 300 chuangin hri an kai thar a, an zinga 15 chu taksa lama harsatna an neih avangin damdawi-inah dah an ni bawk.
UP-ah face mask vuah loin Rs 10,000 chawi dawn
Uttar Pradesh sorkar chuan hri leng laka invenna tur kaihhruaihna siam tharin, sate pumah weekend lockdown a puang dawn a, pawn chhuahnaa face mask vuah lo man chu a vawi khatnaah Rs 1,000 chawi tirin, a vawi hnihnaah Rs 10,000 chawi tir an ni ang.
State sorkarin hriattirna a tihchhuahah, Inrinni zan dar 8 aṭanga Thawhṭanni zing dar 7 thleng lcokdown hi puan a ni a, dawr leh bazar-te khar vek tur a ni a, essential service erawh ngaihnathiam a ni thung. Hemi chhung hian state chhung district 75-ah sanitisation programme kalpui a ni ang. Pathianni bikah total lockdown puan a ni bawk.
Kerala-in mass testing buatsaih
Hri leng hluarna state zinga mi, Kerala-ah chuan state sorkarin ni hnih awh turin nimin aṭanga khan Covid test runpui a buatsaih.
State sorkar chuan ni hnih chhung hian district 14-ah sample nuai 2.5 test hman a tum a ni. Hri kai tam zualna district-ah te chuan mobile RT-PCR testing unit-te siam a ni bawk.
Test runpui neih chhunga test neih sak tam berte chu frontline worker, inthlan kaihhnawiha duty leh Covid hotspot-a duty-te an ni. Kerala-ah hian hri kai enkawl mek hi 63,650 an awm a ni.