Kartarpur Corridor chungchangah India-Pakistan talk nei

Punjab-a Amritsar district-a Attari khuaah nimin khan India leh Pakistan chuan Pakistan-a Gurdwara Darbar Sahib, Kartarpur leh Punjab, India-a Gurdaspur district inkalpawhna tur, Kartarpur Corridor siam chungchangah inbiakna an nei.

India palaite hi Home Ministry Joint Secretary (Internal Security) SCL Das leh External Affairs Ministry Joint Secretary (PAI-Pakistan, Afghanistan and Iran) Deepak Mittal ten an ho.

Pakistan palai, member 18 awmna team hi Director-General South Asia and SAARC Dr Mohammad Faisal-an a ho a, nimin zing dar 10 vel khan India hi an rawn thleng a ni. Ram pahnih aiawhte hian Attai-Wagah border-a India lam khuaah inbiakna hi an nei a ni. India palaite hian Marh 28 hian Islamabad an pan ve leh ang.

Nikum November thla khan ram pahnihte hian Kartarpur corridor siam hi an lo remti tawh a ni. He corridor hmang hian India rama Sikh sakhaw zawmtu, biakzina kal Kartapru khua Gurdwara Dabar Sahih tlawh turte chu visa tel loa an kal phalsak an ni ang. Gurdwara Darbar Sahib hi Sikh sakhaw dintu, Guru Nanak Dev phumna hmun a ni. Pakistan chuan kumin November thlaa Guru Nanak-a piancham vawi 550 na pualin he corridor hawn hi a tum a ni.

Vice President M Venkaiah Naidu leh Punjab Chief Minister Amarinder Singh chuan nikum November 26 khan Gurdaspur district-ah Kartarpur corridor siamna tur lungphum hi an lo phum tawh a, a hnu ni hnihah Pakistan Prime Minister Imran Khan chuan Lahore aṭanga km 125-a hla, Narowal-ah lungphum hi a phum ve leh bawk.