LS Poll : Gujarat-ah sum hman dan endik turin officer 400 dah dawn

Income Tax department chuan Lok Sabha inthlanpui lo awm turah sum hman dan leh pawisa leng vel endik turin Gujarat-ah officer 400 chuang a dah dawn. Gujarat-ah hian April 23-ah vote thlak a ni dawn a, Lok Sabha seat 26 a awm a ni.

Election Commission (EC) in inthlan vuakveta dik lo taka sum hman awm ṭhinte veng tura a hriattir angin, Gujarat IT department chuan state headquarters-ah control room dahin, heta ṭang hian an vil dawn niin Director General (Investigation) Amit Jain chuan a sawi. Department hian mipuiten inthlan kaihhnawih sum leng vel dik lo leh rinhlelhawm nia an hriat an report theihna tur telephone number pawh an tichhuak nghal bawk. Kum 2017 assembly inthlanah khan Gujarat state-ah hian vote leina tura hman tum nia sawi, cheng vaibelchhe 1.39 leh rangkachak kg 27 zet man a ni.

Jain chuan district 33-ah team hi an dah vek tih sawiin, control room-in complaint an dawnte chu hriattir nghalin, an awmna biala team-te hian an chhuizui nghal zel dawn tih a sawi. Gujarat bakah IT department chuan Diu, Daman and Dadra leh Nagar Haveli-ahte sum hman dante hi an enfiah tel dawn bawk a ni.