PM-in mipuite lawmthu hrilh

Prime minister Narendra Modi chuan Pathianni zan dar 9-a minute kua chhung light off a, bati leh eng dang chhi tura a ngenna mipuite'n an zawm ṭhat avangin lawmthu a sawi. 

Narendra Modi chuan, "India ram mipui vaibelchhe 130-te inpumkhatna leh chakna chu nizan dar 9-ah khan kan hmu a ni," a ti. Khawpui leh thingtlang khaw tinah, coronavirus-in he rama thimna a rawn thlen bei let a, ti eng turin bati leh eng dangte chhit a ni a, he thil hian hun rei tak hri leng do let thei turin min buatsaih a ni, a ti. 

Prime minister Narendra Modi-a'n Pathianni zana bati leh eng chi hrang hrangte minute kua chhung chhi tura a sawmna chu ram chhung hmun tam takah zawm a hlawh ṭha hle. Hetih lai hian hmun ṭhenkhatah chuan pawna chhuak a, Diwali lawm ang maia halpuah hal leh kawngzawhte an awm a, hei hian sawi zui a hlawh hle. 

Uttar Pradesh BJP Mahila Wing hotu, Manju Tiwari chuan eng chhit hun tura ruatah bati a chhit hnuin van lam hawiin silai a hmetpuak a, coronavirus a beih letna a ni tih a sawi. A Facebook-ah a post-ah, "Bati chhi engin, coronavirus kan hnawt bo e," tiin a ziak. Uttar Pradesh-ah thil lawmna atana silai hmehpuah hi khap a nih avangin, BJP hruaitu thiltih hian sawisel a tawk nasa hle a, a laka action la turin thuneitute an phut. Hemi hnu hian police-te chuan Tiwari lakah hian FIR an ziak lut a ni. 

Tiwari chuan a fimkhur tawk loh avanga thupha chawiin, zan dar 9-a khawpuia bati leh eng dang inchhi a, halpuah hal thawmte chuan Diwali lawmna boruakah a hruai lut niin a sawi.