Mumbai foot overbridge chimah mi paruk an thi

Mumbai khawpuia Chhatrapati Shivaji Maharaj Terminus railway station leh Azad Maidan Police Station inkara kea kalna lei dawh, foot overbridge chu Ningani zan dar 7:30 vel khan a chim a, mi paruk an thi a, midang 31 in hliam an tuar.

Maharashtra Chief Minister Devendra Fadnavis chuan lei chim vanga thi chhungte chu cheng nuai nga ṭheuh pek an nih tur thu leh, hliam tuarte chu Rs 50,000 ṭheuh pek an nih bakah an inenkawlna senso chu state sorkarin a tumsak tur thu a sawi.

Lei chimah hian chhanchhuah hna thawk turin senior police official, fire brigade leh National Disaster Response Force team an kal nghal a, darkar khat chuang zet leichimin a delhte lakchhuah hna hi thawh a ni.

CM Fadnavis chuan lei chim dan chungchang chhui chian a nih tur thu sawiin, chhiatna thlenga mawhphurtute chunga hremna lekkawh a nih tur thu a sawi bawk. FIR pawh thehluh a ni tawh a ni, a ti. Hemi rual hian a hma lawkin lei hi enfiah a ni a, a ṭha tawk nia ngaih a nih thu sawiin, safety certificate pechhuaktu chuan mawhphurhna lian tak a neih thu a sawi. Rail Yatri Praishad president Subhash Gupta pawin lei enfiahtu, auditor-te chunga action lak an phut thu a sawi a ni.

Lei chim chungchangah hian Railway Ministry chuan Shiv Sena hnuaia Mumbai civic body, Brihanmumbai Corporation chu mawhphurtuah a puh a, mahse Sena lawmaker Anil Desai chuan an puhna chu thil dik lo a nih thu a sawi.

Prime Minister Narendra Modi leh Congress president Rahul Gandhi-te chuan lei chima thi chhungte an tuarpui thu leh, hliam tuarte chu an dam ṭhat leh thuai an duhsak thu an sawi.