EVM leh VVPAT phurtu motor-ah GPS tracker hmang vek dawn

Lok Sabha inthlanpui neih tura vote thlakna atana hman tur, electronic voting machines (EVMs) leh voter verifiable paper audit trail (VVPAT) khawl phurtu motor-ah an kalvelna chhui zui zel theih turin GPS tracking system dah vek an ni dawn tih Election Commission chuan a sawi.

Nikuma state panga-a assembly inthlan neih ṭum khan EVM leh VVPAT khawlte hi hotel, kawngpui leh MLA chenna inahte hmuh an ni a, hei vang hian EC chuan he thutlukna hi a siam ta a ni.

EC chuan state hrang hranga chief electoral officer-te hnenah hriattirna pein, EVM leh VVPAT phurtu motor-te chu uluk taka thlithlai reng turin a ti. Inthlanpui neih turah hian EC chuan polling station nuai 10.35 a siam dawn a, vote thlakna turin EVM nuai 39.6 leh VVPA nuai 27.4 hman a ni ang.

EC chuan a vawikhatna atan inthlan buaipuitu, poll observer-ten report an thehluhna turin mobile application a hmang dawn. Ningani khan EC chuan Lok Sabha leh State assembly inthlan neih tura observer tur, IAS, IPS leh IRS official 1,800 chuangte chu meeting a neihpui a ni. Observer-te hman tur hian 'Observer App. siam a ni dawn a, hemi hmang hian thu pawimawh leh inhriattir ngaite chu observer-te hian an hmu thei dawn a ni. Hei bakah hian an mobile application dang, "cVIGIL' kaltlanga Model Code of Conduct palzut leh sum chelek dan dik lo thehlutte pawh 'Observer App' ah hian hmuh theihin a awm bawk ang.