Ni li chhung a zawnin hri kai thar nuai hnih chuang awm

India ramah Covid-19 hri lengin zual lam a la pan zel a, Inrinni liam ta khan ni khatah hri kai thar tam ber ni a nih leh bakah, ni khata hripui vanga thi an tam ber ni a ni bawk.

Inrinni khan ram pumah hri kai thar mi 2,61,500 awm belh lehin, ni li chhung a zawnin hri kai thar hi nuai hnih chuang zel an tling tawh. Kar liam ta chhung khan hri kai thar hi nuai 12 chuang an awm hman. Inrinni vek khan hripui vang hian mi 1,501 an thi a, India ramah Covid-19 vanga thi hi mi 1,77,150 an tling tawh.

Hripui vanga Inrinnia thi, mi 1,501 zinga 82.94% chu state 10-a mi an ni. Maharashtra-ah mi 419 in an thipui a, Delhi-ah mi 167 an thi bawk. Hetih lai hian Inrinni khan state/Union territory pakuaah Covid-19 vanga thi an awm lo a, heng state/UT-te chu Dadra and Nagar Haveli, Daman and Diu, Meghalaya, Tripura, Sikkim, Mizoram, Manipur, Lakshadweep, Nagaland leh Arunachal Pradesh-te an ni.

Ni 12 liam ta chhungin India ramah Covid-19 hri kai hmuh chhuah, positivity rate hi a letin a pung hman a, 16.69% a tling. Chhatisgarh-ah weeky positivity rate hi sang berin kar liam ta khan 30.38% a tling a, Goa-ah 24.24%, Maharashtra-ah 24.17%, Rajasthan-ah 23.33% leh Madhya Pradesh-ah 18.99% a tling tih union health ministry chuan a sawi.

India rama hri kai mek, active case mi 18,01,316 zinga 65.02% chu state panga - Maharashtra, Chhattisgarh, Uttar Pradesh, Karnataka leh Kerala-a mi an ni.

Delhi-ah ICU khum awl a tlem tawh
Delhi chief minister Arvind Kejriwal chuan Delhi khawpuia hri kai an pun chak avangin damdawi-in hrang hrangah Intensive Care Unit (ICU) khum awl 100 pawh a tling tawh lo tih a sawi.

Nimina virtual press conference a neihah, Delhi CM chuan sorkar laipui puihna a dil a, hri leng dona kawnga a hmaa a lo puih tawhna avangin lawmthu a sawi nghal bawk. Nimin zing khan union home minister Amit Shah hnenah damdawi-ina ICU khum awl a tlem thu leh, oxygen an indaih loh ṭan thu pawh a hrilh niin Kejriwal chuan a sawi.

Sorkar laipui enkawlna hnuai Delhi-a damdawi-in hrang hrangah khum 10,000 chuang awmah, Covid-19 hri kai enkawlna turin khum 1,800 chauh dah a nih thu sawiin, sorkar laipui hnenah hian hri kaite awmna turin khum 7,000 tal ruahman tura a ngen thu Kejriwal chuan a sawi bawk.

Kapil Sibal-a'n health emergency puang turin PM phut
Ram chhung a coronavirus hri lengin zual lam a pan zel avangin union minister hlui leh Congress hruaitu hlun Kapil Sibal chuan prime minister Narendra Modi chu health emergency puang turin a nawr.

Sibal chuan nitin hri kai enkawl dam aiin hri kai thar an tam zawk zel tih sawiin, PM chu national health emergency puang turin a phut a, Election Commission pawh election rally buatsaih khap turin a ngen bawk.