EC-in vote thlak hma darkar 48 chhunga manifesto tihchhuah khap

Election Commission chuan kar kalta Inrinni khan hriattirna tichhuakin, Lok Sabha inthlanpui neih turah political party-te chu vote thlak hma darkar 48 chhunga election manifesto tihchhuah a khapsak.

Commission chuan election manifesto tihchhuah hun chungchanga khuahkhirhna a siam hi Model Code of Conduct (MCC)-ah a telh a ni. Model code siamṭhatah hian, inthlan neihna turah chuan Representation of the People Act 1951-a Section 126 hnuaia khapna hunin a huam chinah manifesto hi tihchhuah a ni tur a ni lo tih a ni. RP Act Section 126 hian vote thlak hma darkar 48 chhung inthlan campaign lam reng reng kalpui a khap a ni. Mahse manifesto thehdarh leh tihchhuah hun chungchang hi a hmain telh a ni lo a, hei vang hian Election Commission chuan a rawn telh thar ta a ni.

Kum 2014 Lok Sabha inthlanpui neih khan vote thlak niin BJP chuan an election manifesto an tlangzarh a ni. Congress chuan he thil hi EC-ah a complain a, mahse Model Code of Conduct-ah manifesto tihchhuah theih hun bithliah siam a lo nih loh avangin commission lam pawhin hma an la chhunzawm thei lo a ni.

EC-in a din panel chuan tun hnaiah vote thlak hma darkar 72 chinah party-te chu an manifesto tihchhuah khap a rawt a, hemi chungchangah hian party dangte chuan engmah sawi lo mah se Congress party chuan a he rawtna hi a duh lo a, hemi hnu hian darkar 48-ah tih a ni leh ta a ni.