Goa CM Manohar Parrikar vuiliam a ni

Goa Chief Minister Manohar Parrikar chu pancreatic cancer vangin Pathianni zan dar 6.40 khan kum 63 mi niin a thi a, nimin tlai khan chawimawina nen vuiliam a ni.

Manohar Parrikar hi cancer natna vang hian kum khat chuang enkawl a ni tawh a, nikum February thla aṭang khan Goa, Mumbai, Delhi leh New York hospital-ahte enkawl a lo ni tawh ṭhin. Thla hmasa khan Goad Medicla College and Hospital-ah admit a ni. Damdawi-in aṭanga a chhuah hnuah Panaji-a a fapa inah enkawl chhunzawm a ni a, Inrinni aṭang khan a dinhmun hi ṭlahniamin Pathianni zan khan a thi ta a ni.

Goa sorkar chuan an chief minister hi ni sarih chhung sun a ni dawn tih sawiin, hemi chhung hian state chhungah hnam puanzar chu a ngul chanve-ah zar a ni ang. Sorkar laipui pawhin nimin kha Parrikar sunna ni atan a puang bawk.

Parrikar-a ruang hi nimin zing dar 9:30-10:30 chhung khan Bharatiya Janata Party (BJP) office-ah dah niin, hemi hnu hian amah ngaisangtuten an thlah theihna turin dar 11 aṭanga tlai dar 4:00 thleng Kala Academy-ah a ruang hi dah leh a ni. Tlai dar 4-ah Kala Academy aṭangin a ruang hi Panjim-ah lak a ni leh a, tlai dar 5-ah vui liam a ni ta a ni.

Goa chief minister vuina inkhawmah hian Prime Minister Narendra Modi, Union Home Minister Rajnath Singh leh BJP chief minister hrang hrangte an tel. Parrikar sunna lantir nan hian nimina union cabinet meeting neih tur pawh ṭhulh a ni bawk.

Parrikar hi Goa chief minister ṭum li a ni a, Goa-a BJP chief minister ni theu hmasa ber a ni bawk. Prime Minister Modi-a kaihhruai NDA sorkarah defence minister a lo ni tawh bawk.

Goa CM thar tur ngaihtuah
Chief Minister Parrikar thlaktu tur hi Pathianni zan khan Union minister Nitin Gadkari hoin BJP chuan an thawhpui Goa Forward Party (GFP) leh Maharashtrawadi Gomantak Party (MGP) te nen an ngaihtuah nghal a, nimin khan ngaihtuah chhunzawm lehin meeting-ah hian GFP hruaitute erawh an tel tawh lo. Gadkari chuan an party chuan CM tur hi a thlang fel tawh a, mahse an thawhpui party te nena an inhriatthiam lohna chu chinfel phawt a ngai tih a sawi.

Goa Assembly hi member 40 awmna a ni a, mahse BJP MLA pahnih Manohar Parrikar leh Francis D'Souza te an thih avang leh, Congress MLA pahnih an ban bawk avangin tunah hian member 36 an awm mek a ni. Tuna member awm zat aṭang chuan sorkarna siam thei tur hian member 19 neih tlin a ngai a ni. Congress party hi party mala seat ngah ber niin, MLA 14 a nei mek a, BJP hian MLA 12 a nei. GFP, MGP leh Independent ten MLA pathum ṭheuh neiin, NCP chuan MLA pakhat a nei bawk.

Goa assembly inthlan neihah khan Congress party hi party mala seat la hnem ber ni mah se Governor chuan BJP chu a thawhpuite nena sorkar siam tura a sawm hmasak avangin sawiselna pawh a nasa hle a ni. Congress leader Chandrakant Kavlekar chuan nimin khan Governor Mridula Sinha hmuin sorkarna siam tura an party sawm tura an ngen thu a sawi.