UK court-in Nirav Modi manna tur thupek tichhuak

Punjab National Bank (PNB) sum tam tak tichingpentu, England-a tlanchhia, Nirav Modi-a manna thupek chu Thawhṭanni khan Westminster Magistrates Court chuan a tichhuak.

Nirav Modi leh a pu Mehul Choksi-te chu PNB sum tam tham tak an tihchingpen hnuah India chhuahsanin ramdangah an tlanchhia a, Modi hi UK-ah a awm tih nikum laihawl khan British thuneitute chuan an nemnghet a ni. Modi hi central London-ah chengin, lunghlu lam sumdawnna thar a siam nia sawi a ni. Hemi hnu hian a thubuai neihte a hmachhawn theih nan India rama thawnkir tura ngen a ni. Home secrtary Sajid Javid-an ngenna a siam leh hnuah court chuan manna tur thupek hi a tichhuak ta a ni.

Arrest tihchhuah a nih tak avangin Modi hi man theih reng a ni tawh a, mahse Scotland Yard thupuangtu chuan man a nih a, court-ah hruai a nih hma chuan India rama thawn tura ngenna chungchang hi an la ngaihtuah theih loh thu a sawi.