India ramah Covid-19 hri kai thar zat pung zel : Ni 11 chhungin hri kai tam ber ni record ni 10 awm

India ramah Covid-19 hri kai hmuh chhuah thar zat an la pung zel a, ni 11 liam ta chhung khan ni 10 chu ni khata hri kai hmuh chhuah tam ber ni record a ni zel a ni.

Pathianni khan ram pumah hri kai thar mi 2,73,810 awm lehin, hemi ni vek hian hripui vanga thi mi 1,619 an awm bawk. Ni 12 liam ta chhungin nitina hri kai hmuh thar, positivity rate chu 16.69% a ni tawh a, Delhi bikah chuan positivity rate hi 30% niin, mi pathum test-ah pakhatin hri kai zel ang a ni.

ICMR hotu Dr Balgram Bhargava chuan India ramah Covid-19 hri leng thawh hnihna thleng mekah hri leng thawh khatna thlen lai aiin thihpui an tam zawk hran lo tih a sawi a, hemi rual hian hri leng thawh hnihnaah hian hri kai zingah thawk lama harsatna nei, oxygen hman ngai erawh an tam zawk tih a sawi. Nimina virtual meeting-a thu a sawiah, Dr Bhargav chuan hri leng thawh khatnaah khan khuh, taksa na leh luna te an tam laiin, a thawh hnihnaah chuan thawk laka harsatna nei an tam zawk a ni, a ti. RT-PCR test a pawimawh thu sawi zawmin, hemi hmang hian Covid-19 hri chi hrang hrang hmuh hmaih a awm lo tih a sawi bawk.

April 26 zing thleng Delhi-ah total curfew puang
Delhi khawpuiah nizan dar 10 aṭanga kartawp thleng total curfew puan tawh chu hri kai an pun belh zel avangin April 26 zing dar 5 thleng pawhsei a ni.

Pathianni khan Delhi-ah hian hri kai thar mi 25,462 hmuh belh leh in, sample endik aṭanga 30% te an positive. Delhi chief minister Arvind Kejriwal chuan tun dinhmun ah Delhi damdawi-in ahte hri kai enkawlan tur, ICU khum 100 pawh awl a awm tlin tawh loh thu a sawi

Sorkar laipui chuan Delhi-a hri kai an pun chak avangin khum 2,000 dawn awmna, Sardar Vallabh Bhai Patel Covid-19 Care Centre chu a hawng leh dawn. He centre hi Indo-Tibetan Border Police (ITBP) in an enkawl dawn a, ni hnih thum hnuah damlo enkawlna atan hian hman theiha peihfel tum a ni. Centre-a hri kaite enkawlna kawngah ITBP-a doctor leh paramedic-ten an pui dawn a, ei leh in tur chu Radha Saomi Satsang Beas-in a thlawnin a pe dawn bawk a ni.

Covid-19 thawh hnihna tuar na ber Maharastra

India ram state zinga Covid-19 hri leng thawh hnihna tuar na ber,Maharashtra-ah Pathianni khan hri kai thar mi 68,631 awm belhin, mi 503 in an thihpui bawk. Minute khatah mi 2,859 zelin hri kai thar ang an ni a, minute thum danah hri vang hian mi pakhat zel thi ang an ni bawk tih state health department chuan a tarlang.

Maharashtra ah hian hri kai hmuh chhuah tawh 38,39,338 awm tawhin mi 60,473 in nunna an chan tawh bawk.

Ram chhunga oxygen indaih lohna phuhruk nan Indian Railways chuan 'Oxygen Express' rel hmangin liquid medical oxygen leh oxygen cylinder-te chu indaih loh zualna Maharastra leh state dangah a phur ṭhin dawn tih a puang.