Sena-in Parliament special session neih phut

Shiv Sena party chuan India ram chhunga Covid-19 hri leng hluar thar leh avanga harsatna awm leh hma lak dan turte ngaihtuah tura ni hnih awh, Parliament special session ko turin sorkar laipui an phut.

Rajya Sabha-a Sena MP, Sanjau Raut chuan hri leng avangin ram chhung hmun hrang hrangah manganna leh chiaina a thleng mek a ni, a ti. "Indona thlenna hmun ang mai a ni. Hmun tinah mipuite an chiain an mangang a, khum, oxygen leh vaccine indaih lohna nen, buaina nasa tak a thleng mek a ni. Thil awmdan leh hmalak dan turte sawiho turin Parliament special session, ni hnih chhung tal neih a ngai a ni," a ti.

Maharashtra chief mini­ster Uddhav Thackeray chuan kar liam ta khan prime miniser Narendra Modi pawh hri leng vanga harsatna thleng mek chungchang sawipui a lo tum tawh a, mahse PM hi West Bengal lamah election campaign-in a la buai tih hrilh a nih thu a sawi. Hei hian sawizui leh sawisel pawh a hlawh hle.