Goa CM tharin fiahna paltlang

Mannihar Parokar a thih hnua Goa Chief Minister thar atana lakluh, Pramod Sawant-a kaihhruai BJP sorkar chu nimin khan Assembly-ah fiah a ni a, CM thar hian fiahna hi a paltlang.

Sorkar fiahna tur hian Governor chuan nimin khan assembly special session hi a ko a ni. Inkhawm hi Deputy Speaker Michael Lobo-an a kaihruai a, Vote laknaah sorkar thlawp lamah vote 20 a tla a, a thlawp lo lamah vote 15 a tla thung.

Fiahna paltlang tur hian MLA 19-te thlawpna neih a ngai a, Goa Assembly hi seat 40 awmna ni mah se, BJP MLA pahnih an thih vang leh Congress MLA pahnih an ban avangin tunah hian member 36 an awm mek a ni.

Fiahna a paltlang hnuah CM thar Sawant chuan assembly member zawng zawngte chu an state hmasawnna tura thawhpui vek turin a sawm nghal a ni.

BJP kaihhruai sorkar hi Goa Forward Party, Maharashtra Gomantak Party leh Independent MLA-ten an thlawp a ni. BJP hian MLA 12 neiin, a dangte hian MLA pathum ṭheuh an nei. Eptu party, Congress chu party mala seat ngah ber niin MLA 14 a nei.