PM-KISAN beneficiary 44% ten sum la dawng lo

Sorkar laipuiin ramchhunga loneitu, ram hectare 2 aia zim neite ṭanpuina tura kum khata Rs 6,000 pekna tura scheme a siam, Pradhan Mantri Kisan Samman Nidhi (PM-KISAN) dawngthei tur zinga chhungkaw 56% chauhin sum hi an la dawng a, chhungkaw 44% in tun thlengin an la dawng ve lo thung.

February thlaa Parliament inkhawma 2019 Union Interim budget a pharh ṭumin hetihlaia finance ministry changtu, Piyush Goyal chuan PM-KISAN scheme hi a puang a, Prime Minister Narendra Modi chuan Ferbuary 24 khan Uttar Pradesh-ah he scheme hi tlangzarhin loneitu vaibelchhe khat chuang hnenah Rs 6,000 an dawn tur aṭanga first instalment, Rs 2,000 chu an account-ah dahsak an ni. March 31-ah he scheme beneficiary zawng zawngte hnenah first instalment hi pek vek tura tih ni mah se, tun thlengin state sorkar hrang hrangin benefiacy list a thehlut zinga 44% chuan pawisa hi an la dawng ve lo a ni. Kum khat atana ṭanpuina tur sum, Rs 6,000 pek tur hi ṭum thuma pek tura tih an ni.

PM-KISAN scheme beneficiary list thehlut hi vaibelchhe 4.92 niin, an zinga vaibelchhe 2.74 hian Rs 2,000 hi dawng tawhin, mi vaiblchhe 2.18 erawhin an la dawng ve lo a ni.