Kashmir-ah firfiak panga kaphlum

Indian Army leh police-te chuan Jammu and Kashmir-a Kahsmir Valley district pathumah darkar 24 chhungin firfiak panga an kaphlum a, an zinga pahnih hi Jaish-e-Mohammed (JeM) mi leh sa a nih thu nimin khan an sawi.

Fifiak pahnih chu Kashmir hmarlama Kalatnara Payeeen district-a Baramulla-ah kahhlum an ni a, pahnih dang chu Bandipora hmarlama Hajjin-ah kahhlum niin, pakhat chu Kashmir chhim lama Shopian-ah kahhlum a ni.

Hajjin-ah hian Ningani aṭang khan security force leh firfiakte hi an inkap a, security force-ah hian 13 Rashtriya Rifles, Central Reserve Police Force’s (CRPF’s) 45 Battalion leh J&K police special operation group an tel.

Shopian-ah pawh security force-te hian firfiak an awm tih thu an dawn avangin beihpui thlak turin an kal a,firfiak pakhat an kaphlum a ni.

Police thupuangtu chuan Baramulla-a kahhlum firfiak pahnih zinga pakhat chu Pakistan mi a ni tih hriatchian a ni tawh tih a sawi a, heng firfiak pahnihte hi JeM mi leh sa niin, security force-te hmun leh civil mite beih chungchangah man tuma zawn mek an ni tih a sawi. An inkahna hmunah hian silai leh a mu eng emaw zat hmuh a ni a, AK 47 assault rifle pawh a tel a ni.

Sopore-a Warpora area-ah pawh firfiak leh security force-te inkapin thi leh hliam erawh an awm lo nia hriat a ni. Police-te chuan Sopore-a zirna inte chu nimin khan khar niin, mobile internet service pawh tihtawp lailawk a nih thu an sawi.