Gandhinagar bial BJP candidate atan Advani aiah Amit Shah dah

Bharatiya Janata Party (BJP) chuan Lok Sabha inthlanpui neih tura an party candidate list hmasa ber chu Ningani khan an tichhuak a, party hruaitu hlun LK Advani-an hun rei lo a bial tawh, Gujarat-a Gandhinagar bialah chuan Advani aiah party president Amit Shah dah a ni.

Amit Shah hi Gujarat-a Naranpura bialah kum 2012 khan Assembly inthlanah thlan tlin a ni a, a hnuah Rahya Sabha member-ah thlan a ni leh a ni. Naranpura hi Gandhinagar Lok Sabha constituency in a huam tel a ni.

State BJP unit chuan Prime Minister Narendra Modi emaw, party president Amit Shah emaw hi an state chhung aṭanga Lok Sabha inthlana chuh ve turin an phut a ni. March 16 khan BJP chuan Gandhinagar-a party worker leh hruaitute ngaihdan zawt turin observer-te tir a, an zinga a tam zawkin Shah hi ding turin an duh niin party observer Nimaben Acharya chuan a sawi.

Kum 91 mi, Advani hi union home minister leh deputy prime minister pawh lo ni tawh niin, Gandhinagar bialah hian ṭum ruk zel thlan tlin a ni tawh a ni. Kum 1984-a BJP in Lok Sabha-a seat hnih chauh a neih hnua BJP party invawrchhoh leh tun dinhmuna thlen theihna tura thawhktu pawimawh tak a ni.

Kum 2014-a PM Modi-a kaihhruaia party in inthlanpuia hnehna an chan hnuah khan Shah chu party president-ah dahin, party thuneitu Parliamentary Board aṭangin Advani hi ban a ni bawk.