May 1 aṭangin kum 18 chunglam Covid-19 vaccine pe dawn

India ramah Covid-19 vaccine pek runpui neih mek a ni a, frontline/healthcare worker-te bakah kum upa zawkte pek hmasak an nih hnuin, May 1 aṭangin kum 18 chin chunglamte hnenah vaccine hi pek ṭan a ni dawn.

Sorkar laipui chuan zau zawka vaccine pek chhuah hi kalpui a nih theihna turin vaccine siamtute hnen aṭangin state sorkar, private hospital leh industrial company-ten an lak a phalsak dawn a ni.

Vaccine pek runpui thawh thumnaa kalpuina turah hian vaccine siamtute chuan an thlatin siamchhuah aṭangin dose 50% chu central sorkar hnenah an supply ang a, a bak 50% dose chu state sorkar hnenah leh open market-ah an pek phalsak an ni. State sorkar leh open market-a vaccine an pekna man tur hi May 1, 2021 hmain an puang lawk tur tih a ni bawk.

Private hospital-te chuan vaccine chu sorkar laipui hnena pek tur aṭang ni loin an hmuh a ngai a, anmahni kaltlanga vaccine lak man chu chiang takin an puangzar bawk tur a ni a, kum 18 tling chinten an lak a phalsak vek tur a ni bawk.

Sorkar lapuiin vaccination centre-a Health Care Worker (HCW),Front Line Worker (FLW) leh kum 45 chunglam tana a thlawna vaccine a pek chu chhunzawm zel a ni ang.

Sorkar laipui hnena vaccine pek leh, sorkar kaltlang loa pek chhuahte chu rualkhai taka sem tum a ni. Sorkar chuan a chanpual aṭangin state/UT-te hnenah Covid-19 vaccine chu hri kai tam dan azir leh, an mamawh ang zela pek chhuah a nih tur thu a sawi a, ram pawn aṭanga lakluhte chu hman mai theih tura peih turin a ti bawk.

Vaccine tihchhiat/tihriral a tam
State eng emaw zatin Covid-19 vaccine an indaih loh chhoh mek laiin, RTI hmanga zawhna chhannaah India ramah Covid-19 vaccine tihchhiat leh tihriral tam tham tak a awm.

Covid-19 tihriral zawng zawng zinga 12% chu Tamil Nadu-ah niin, Haryana-ah 9.74%, Punjab-ah 8.12%, Manipur-ah 8.7% leh Telangana-ah 7.55% a awm bawk. State hrang hrangte vaccine tihriral hi dose maktaduai 44 chuang a tling a ni. Hemi rual hian state ṭhenkhatah vaccine tihchhiat leh tihriral a awm lo thung tih sawiin, heng state/UT-te hi Kerala, West Bengal, Himachal Pradesh, Mizoram, Goa, Daman and Diu, Andaman and Nicobar Islands leh Lakshadweep-te an ni.

Vaccine pek chhuah runpui kalpui mekah hmun ṭhenkhatah vaccine indaih lohna a thleng a, Maharashtra, Punjab leh Delhi pawh sorkar laipui chungah an lungawi lo a, mipui awm zat a zira vaccine pek chhuah nia sawiin Gujarat state-in a dawn zat an pha lo hle tih an sawi. Tun hnaiah state tam takin sorkar laipui hnenah vaccine an mamawh belh thu hi an thlen bawk.

Covid-19 vaccine lakluhah chhiah awl tir dawn
Sorkar laipui chuan ram dang aṭanga Covid-19 vaccine lakluhah chhiah a awl tir dawn nia sawi a ni.

Russia aṭangin Sputnik V vaccine lakluh thuai a ni dawn a, hei bakah hian sorkar chuan Pfizer, Moderna leh Johnson and Johnson-te chu an vaccine siam lei tir turin a ngen tawh bawk.

Ram chhungah hri kai an pun chak avangin sorkarin vaccine tam zawk neih tumin hma a la a, vaccine lak luhah chhiah awl tir a tum bakah, private company-te pawh open market-a zawrh chhuah turin ram dang aṭanga vaccine lak luh phalsak an nih theih dan pawh a ngaihtuah mek nia sawi a ni.