Darkar tin hri kai thar 10,000 chuang leh Hri thihpui mi 60 awm anga chhut a ni

India ramah Pathianni, April 18 aṭang khan darkar tin Covid-19 hri kai thar mi 10,000 chuang leh hri vanga thi mi 60 awm ang zela chhut a ni.

April 1 khan union health ministry data aṭanga a lan danin, darkar tin hri kai thar mi 3,013 leh thihpui mi 19 zel awm anga chhut a ni. Mahse hri lengin zual lam a la pan zel avangin ni rei lote hnuah hri kai thar leh thihpui zat hi nasa takin an pung chho tawh a ni.

Thawhṭanni khan hri kai thar mi 2,59,170 leh hri vanga thi mi 1,761 an awm belh leh. Hemi ni bik hian India ramah darkar khatah hri kai thar mi 10,798 awm ang zel niin, darkar khat chhung vek hian mi 73 zel thi ang an ni bawk.

UK-in travel red list-ah India telh
United Kingdom prime minister Boris Johnson-a'n India ram a zin tur a ṭhulh thu a puan hnuah, UK sorkar chuan India ram chu travel red list-ah a telh a, India ram aṭanga an rama luh a khap dawn.

Tun hnaiah Britain-ah hian India rama Covid-19 hri chi hran hmuh chhuah ang kai hi mi 103 an awm thar a ni.

Sorkarin India ram aṭanga luh khapna thupek a siam hi April 24 aṭanga hman ṭan a ni dawn a, hemi ni 10 chhunga India ram aṭanga lutte chu sorkar-in quarantine hotel atana a pawmahte ni 10 chhung inkhung hrang turin a ti.