LS election : Campaign-na atan WhatsApp hmang uar

Lok Sabha inthlanpui, thawh sariha neih tur chu April 11 aṭang hian neih ṭan a ni dawn. Inthlan neih tur atana social media lama campaign nan Facebook aiin WhatsApp hman nasat a ni zawk nia sawi a ni.

Social media expert Anoop Mishra chuan inthlan campaing-a vote zawn nan WhatsApp group 87,000 vel chu an active mek niin a sawi. Heng group aṭang hian vote zawn nan statistic dik tawk lo te, tharum thawhna thlen thei lam hawi thu te, political news siam danglam te, sorkar eirukna te, puithuna lam thil te, ram hmangaihna leh Hindu nationalism chungchangte thehdarh an ni ṭhin tih a sawi.

WhatsApp group pakhatah hian user 256 chin zel an awm thei a, group 87,000 chuang aṭanga thu thehdarhte hi direct-in mi vaibelchhe 2.2 chuangin an lo hmu ṭhin a ni.

WhatsApp chuan social media hmanga thu dik lo thehdarh ṭhinte tihtawp leh khuahkhirh a pawimawih zia hriaiin kawng hrang hrangin hma a lo la tawh a, TV, radio leh thil dangahte thu dik lo thehdarh hlauhawmzia chungchangah awareness programme-te pawh a lo siam tawh a ni. Nasscom Foundation nen pawh thawkdunin, thu dik lo thehdarhte lo manchhuak a, WhatsApp a him zawkna tur ngaihtuah turin India mi nuai khat vel training pek pawh an tum bawk.