J&K land law thar duh lohna lantir

Sorkar laipuiin union territory, Jammu and Kashmir land law siamṭha a, pawn lam miten ram an lei a phalsak tak avangin tualchhunga party hrang hrangte an lungawi lo a, Hurriyat Conference huaihawtin Inrinni khan he dan siam thar duh lohna hi lantir a ni. 

October 27 khan Ministry of Home Affairs (MHA) chuan Jammu and Kashmir-a dan hman lai eng emaw zat siamṭhain, pawn lam miten ram (urban land and immovable property) an lei theihna tur Jammu and Kashmir Reorganisation (Adaptation of Central Laws) Third Order, 2020 a tichhuak a ni. 

Land law thar duh lohna lantir vang hian Srinagar khawpuia dawr, petrol pump leh sumdawnna dangte chu khar a ni a, public transport khar a ni bawk. Kashmir hmar leh chhim lama khawpui hrang hrangah pawh lungawi lohna hi lantir a ni. Nawrh huaihawt vang hian buaina a chhuah venthawn thilah Srinagar leh Kashmir Valley-ah chuan security force tam tham tak duty tir an ni bawk. 

Hurriyat Conference chuan he dan siamṭhat hi na taka sawiselin, sorkar laipui chuan a duh dan angin Jammu and Kashmir mipuite chu a nawr lui zel a ni, a ti. "J&K-a inremna leh muanna siam aiin, inrem lohna tur thil chu sorkar laipui chuan a rawn siam thar zel a, kan ram kan hnam leh kei mahni tibo thei zawngin dan hrang hrang a rawn hmanga a rawn her danglam mek bawk," tiin an thuchhuahah an tarlang. 

Kar liam ta Thawhlehnia  sorkar laipuiin J&K-a dan thar a hman tak duh lohna avang hian J&K-a political party-te leh mipui tam tak chuan ṭum eng emaw zawt lungawi lohna an lo lantir tawh bawk.  Kar liam ta Ningani khan Peoples Democratic Party (PDP)  chuan land law siamṭhat duh lohna lantirin kawng an zawh a, kawng zawh zingah mi ṭhahnem tham tak chu hren zui an ni. 

National Conference hotu leh chief minister hlui Omar Abdullah chuan political party hrang hrangte land law thar duh lohna lantira nawrh huaihawt an tum, sorkar laipuiin a phalsak lo chu na takin a sawisel zui.