NMC-in regulation thar a tichhuak

Medical Council of India (MCI) thlaktu, National Medical Commission (NMC) chuan MBBS admission leh medical college dinna atana kaihhruaina thar a siam a tichhuak. 

September 25 aṭang khan NMC hi a ding ṭan a, a din hnuah a hmasa ber atan kar liam ta Inrinni khan regulation thar hi a tichhuak a ni. Regulation thar a tihchhuahah hian medical college dinna atana ngai te, medical college awm mekten academic year 2021-22 atana MBBS zirlai tam zawk an lak theihna turte a siam a ni. 

NMC regulation tihchhuah hmasa ber hi ‘Minimum Require­ments For Annual MBBS Admi­ssions Regulations (2020)’ tih a ni a, he regulation hian sorkarin a ṭhiah tak, MCI hnuaia Minimum Standard Requirements for Medical Colleges, 1999 (for 50/100/150/200/250 Annual Admissions) a rawn thlak a ni. 

He dan thar hi India rama medical lama zirna  tihchangtlun a nih theihna tur a ni a, NMC chuan medical college hospital-a zirlaite tana seat 100 awm china khum 530 neih a ngai ṭhin kha khum 430-ah a tihniam a, seat 200 awm chinah chuan khum 930 neih ngai ṭhin khan 830-ah a tihniam bawk.

Dan thar hnuaiah hian medical college din dawna ram neih ngai zat acre 5 chin tih ṭhin pawh paih a ni a, college-ah hian zirlaite hman tur skills laborator erawh neih ngei ngei tur a ni thung. E-learning chu a tam thei ang bera kalpui tum a ni a, educational pedagogy lama training medical teacher-te tan Medical Education Unit dah a ni bawk ang. 

Lehkhabu, journal leh library hmun chu tihtlem  a ni a,  e-learning nasa zawka kalpui tum a ni thung.  Zirlaite  rilru lama harsat­na nei an awm thu hlaah student counselling service din tum a ni bawk. Medical college din thar a nih chuan kum hnih chhung in khum 300 an nei hman tur a ni. A hma kha chuan a hun chhung tur hi siam a ni lo.

Undergraduate medical student-te tan teaching department thar pahnih medical college hospi­tal zawng zawngah siam a ni ang. Department of Emergency Medicine chuan Casualty Depart­ment chu a thlak dawn a ni.

Dan thar hnuiaah hian tier 1 leh tier 2 khawpui, tlang ram leh northeast state-te, notified tribal area hmunah chuan medical college hospital din nan, ram plot hnih chiah a ngai thung a,  plot khat chu teaching hospital atan hman tur a ni a, a dang plot khat chu medical college leh hostel atana hman tur a ni.