EC-in Modi film siamtute hriattirna pe

Election Commission chuan Prime Minister Narendra Modi-a film siamtute chu April 5-a film tlangzarh an tum chu model code of conduct palzutna nia sawi chungchangah insawifiah turin a hriattir.

East Delhi Returning Officer K Mahesh chuan March 20 khan 'PM Narendra Modi' film siamtu, production house leh music company bakah he film fakna chhuahtu, chanchinbu pahnihte chu hriattirna pek an ni tawh a, tun thleng chhanna an la pe lo tih a sawi. Returning officer chuan ECI hennah pawh inthlan vuakveta political film tihchhuah chungchangah kaihhruaina siam tura an duh thu a sawi bawk.

Congress party chuan EC hnenah Modi-a film hi politics kaihhnawih a nih avangin inthlan hmaa tlangzarh a nih chuan Lok Sabha inthlan turah BJP tan campaign-na leh hlawkna a neih theihna tur a ni tiin, tlangzarh tum hi dang rih turin a ngen a ni.

Congress hruaitu Kapil Sibal, Abhishek Manu Singhvi, RPN Singh leh Randeep Singh Surjewala-te chuan EC hi an hmu a, an hmuh hnua chanchinthar lakhawmtute an kawmaah Sibal chuan he film hian a tum ber chu politics lam a ni tiin, inthlana hlawkpui tumna a ni, a ti. He film siamtu, producer pathumte leh a changtu Vivek Oberoi-te chu BJP party mi leh sa an nih thu a sawi bawk.