Inthlana chuh ve lo turin min ti : BJP veteran Joshi

BJP hruaitu hlun Murli Manohar Joshi chuan an party chuan Lok Sabha inthlanpui neih tura chuh ve lo turin an ti tih a sawi.

Nimina Uttar Pradesh-a Kanpur constituency-a thu a sawiah, kum 85 mi Joshi chuan party-in in thlana chuh ve lo tura an tih thu leh, hei hi BJP general secretary Ramlal-an a hrilh thu a sawi. Joshi hma hian BJP hruaitu leh hun rei tak an party khaidingtu lo ni tawh ṭhin, LK Advani pawh a bialah an party ticket-a ding turin an president Amit Shah an a lo dah tawh bawk.

Joshi hi union minister hlui niin BJP president pawh a lo ni tawh a ni a, mahse UP-a BJP candidate list tihchhuahah telh a ni lo. Kum 2014 inthlanpuiah khan Joshi hian UP-a a bial, Varanasi chu PM Modi tan kianin Kanpur-ah a ding a, hneh taka thlan tlin a ni. Mahse tun ṭum inthlan turah an party chuan Kanpur leh hmun dangah inthlan hi chuh ve lo turin an ti niin a sawi.

LK Advani leh Joshi te bakah hruaitu dang Kalraj Mishra, union minister hlui pahnih Shanta Kumar leh Kariya Munda te pawh inthlana chuh ve lo turin party general secretary Ramlal chuan a hrilh a, an chuh dawn lo tih pawh puang turin a ti bawk. Mahse Advani leh Joshi-te erawh chuan hei hi an puang duh lo a ni.

Joshi chuan party in hetiang thutlukna a siam a nih chuan party president chu an hnenah kalin, an thutlukna chu a hrilh tur nia a ngaih thu a sawi. Mahse Amit Shah hian engmah hrilh loin, general secretary kutah hian dah a ni a, Shanta Kuma leh Kariya Munda phei chu phone-a hrilh an ni.

Advani leh Joshi-te hi BJP dintu zinga mi niin, an party tana mi ṭangkai leh pawimawh tak an ni. Mahse kum 2014-a Narendra Modi kaihhruai BJP in thuneihna an chan hnu aṭang khan party-a dinhmun pawimawh pek an ni tawh lo.