Khawvela hri kai thar tam ber ni India ramah thleng

India ramah Nilaini khan Covid-19 hri kai thar 3,14,835 an awm a, khawvela ni khata hri kai thar an tam ber ni a ni. Hemi ni vek hian hian Covid-19 vanga thi 2,104 an awm bawk.

Hri kai hmuh thar zinga 76.66% hi state 10 - Maharashtra, Uttar Pradesh, Delhi, Karnataka, Kerala, Chhattisgarh, Madhya Pradesh, Bihar, Gujarat leh Rajasthan state-a mi an ni. Ram pumah hri leng thawh hnihna thleng mekah hri kai nasa taka an pun chhoh laiin, damdawi-in tam takah dam lo na zual enkawlna tur oxygen indaih lohna a thleng mek bawk.

State hrang hrangte hri darh tur venna atan khuahkhirhna an siam thar leh tawh a, punkhawmte khapin, state tam zawkin zan curfew an puang tawh a ni.

April 15 aṭang khan nitin hri kai hmuh thar hi nuai hnih chuang an ni ziah tawh a, hetilai hian hri leng thawh hnihna 'peak' hi a la thleng lo a, eng hunah nge hri kai hi an tlakhniam theih dawn tih hriatthiam a la ni lo tih mithiamte chuan an sawi.

Hri lengin zual lam a pan mek laiin nimin khan West Bengal-ah assembly inthlan thawh rukna atan mipuiten vote an thlak. Hri leng a hluar mek laia inthlan campaign nei a,mi tam tak punkhawmna election rally-te an buatsaih chhunzawm reng avangin politician-te pawhin sawisel an tawk nasa hle.

SC-in oxygen leh vaccine chungchanga Sorkar laipui ruahmanna siam dan hre duh
Supreme Court chuan ram chhunga hri kai pung zel avanga state hrang hranga oxygen indaih lohna thleng mek leh, vaccine pek chhuah hna kalpui mekah sorkar laipui chuan eng ang ruahmanna nge a siam a zawt.

Chief justice of India SA Bobde chuan, "He harsatna thleng mekah hian sorkarin ruahmanna a siam dan kan hre duh a ni," a ti. Hri kaite enkawlna tur damdawi-in khum, oxygen leh anti-viral drug Remdesevir kaihhnawih harsatna thleng mek chungchanga petition thehlutte chu High Court parukin an lo ngaihtuah tawh bawk.

CJI Bobde chuan tuna India ram dinhmun chu 'national emergency' ang a ni tawh tih sawiin, thil pawimawh tak tak pali - oxygen supply, damdawi supply, vaccine pek chhuah dan leh kalpui tum dante chu an hre duh tih a sawi a ni.

Vaccine la tawh zinga hri kai zat tlem
Sorkar laipui chuan a vawi khatna atan Nilaini khan Covid-19 vaccine la tawh zinga hri kai thar leh data a tichhuak.

Covid-19 vaccine lak tawh zingah, mi 10,000-ah mi 2-4 in hri hi an kai leh tih Indian Council of Medical Research (ICMR) director general Balram Bhargava chuan a sawi. Hemi rual hian vaccine la tawh hri kai zat a hniam leh tih sawiin, chiai phahna tur a awm lo tih a sawi bawk.

January 16 aṭang khan ram pumah Covid-19 vaccine pek chhuah runpui hi neih ṭan a ni a, a thawh khatnaah healthcare/frontline worker-te pek niin, a hnuah kum 60 chunglam leh kum 45 chin natna benvawn neite pek leh a ni a, April 1 aṭangin kum 45 chunglam te pek a ni a, May 1 aṭangin ram pumah kum 18 chinte chu vaccine hi pek tum a ni bawk.