Congress thil tiam sawisel vangin NITI Aayog vice chief hriattirna pe

Election Commission chuan NITI Aayog Vice Chairman Rajiv Kumar chu Congress party-in inthlan campaign-na atana a hman pakhat, NYAY scheme chungchang a sawisel avangin hriattirna a pe a, ni hnih chhunga insawifiah turin a hriattir.

EC chuan Rajiv Kumar hi 'bureaucratic executive' zinga mi a ni a, party poll campaign chungchang a lo sawizui ve hi model code bawhchhiatna lian tak a ni, a ti.

Congress party president Rahul Gandhi chuan Lok Sabha inthlanpui neih turah Congress party chuan hnehna a chang a, sorkarna an siam thei a nih chuan ramchhunga mi rethei zual zinga 20% te chhawmdawlna turin kumtin Rs 72,000 an pek tur thu a sawi a ni. Hei hi Kumar chuan bei letin, Congress party chuan inthlana chak a duh vang ngawtin a tih theih loh tawp tur a tiam a ni, tiin a sawi.

Kumar hian a twitter-ah hemi chungchang hi sawiin, "Income guarantee scheme kalpui an tum hi economics test, fiscal discipline test leh execution test-ah pawh a hlawhchham vek a ni" tiin a sawi. Hei bakah Congress chuan a hmaa chak an duh vanga an tih theih loh tawp tur an lo tiam tawh ṭhin angin, an party president chuan a taka kalpui theih loh tur scheme a puang leh a ni tiin a ziak bawk.

Congress chuan mininum income guarantee scheme, Nyuntam Aay Yojana (NYAY) scheme a sawisel vangin Kumar hi an dem thu an sawi. Congress party chief spokesperson Randeep Surjewala chuan Kumar-a telna, NITI Aayog chu 'Rajneeti Aayog' tia sawiin, he pawl hi BJP office aṭanga enkawl mai tur leh inthlan pawh chuh ve mai turin a ti.

Surjewala chuan NYAY chungchang sawisel a, ram economy tan harsatna a thlen thei dawn nia sawiselte chu chhangin, "He scheme kalpui tum hi uluk takin kan zirin a lanchhuah dan turte pawh kan thlir lawk vek a, a taka kalpui theih ngei a ni tih pawh kan hria a ni" a ti. NYAY chu 'top-up scheme' a ni lo tih sawiin, kalpui a nih dan tur pawh party-in thuneihna a chan hunah a buaipui nghal dawn a ni, a ti. NYAY scheme hnuaiah hian mi rethei chhungkaw vaibelchhe nga-a chhungkaw nu berte chu an account-ah sum hi direct-in pek an ni dawn tih a sawi a, he scheme kalpuina atan hian kumtin cheng vaibelchhe nuai 3.6 vel sen a ni dawn a ni.

Congress party-in minimum income guarantee scheme a siamnaah hian kum 2015-a Economics Sciences-a Nobel Prize latu, British economist Angus Deaton leh 'the modern Marx' tia sawi French economist Thomas Piketty te chuan thurawn an pe nia sawi a ni. Hei bakah party hian Indian-American economist Abhijit Banerjee leh RBI governor hlui Raghuram Rajan te an rawn bawk. Thomas Piketty chuan he scheme siamnaah hian direct-a inrawlhna nei lo mah se, India rama mipuite sum lakluh inkhuangrual lo lutuk tihziaawmna tura hmalakna chu a thlawp tih a sawi.