Facebook-in thu dik lo thehdarh veng turin hma la

Facebook chuan India ram inthlanpui tur kaihhnawiha an platform hmanga thu dik tawk lo thehdarh a ni ṭhin chu veng turin theihtawp an chhuah mek tih company official-te chuan an sawi.

Facebook Product Management for Civic Integrity division director, Samidh Chakrabarti chuan India inthlanpui awm tur chu an dah pawimawh ber zingah a tel tih sawiin, company chu kum hnih kalta aṭang kha hemi atan hian a lo inbuatsaih tawh niin a sawi.

Facebook chuan English, Hindi leh reginonal Indian language dangte hmanga thu dik tawk lo thehdarhte dapchhuak leh lo dang tur hian Indian media organisation-te a thawhpui niin a sawi bawk.

Kum 2016-a US President thlan ṭuma thu dik lo thehdarh ṭhinte a dan loh avangin Facebook hian sawisel a lo tawk nasa tawh hle a ni.

Facebook-in a lei tak, messaging applications WhatsApp pawh thu dik lo thehdarhna atan hman a nih fo avangte, hetianga thu dik lo thehdarh vanga insawisak hlumna hial a thlen ṭhin avangin India sorkar leh security agency-te pawhin an lo sawisel fo tawh bawk.